ނަފުސާނީ ބަލިތަކާ މެދު ދެކޭގޮތާއި އެފަދަ ކަންކަމުގައި ބޭނުންކުރާ ބަސްމަގު ބަދަލުކުރަންޖެހޭ ކަމަށް ރައީސުލްޖުމްހޫރިއްޔާގެ އަނބިކަނބަލުން، މެޑަމް ސާޖިދާ މުހައްމަދު ވިދާޅުވެއްޖެއެވެ.

ދުނިޔޭގެ ނަފުސާނީ ސިއްހަތުގެ ދުވަހާ ގުޅިގެން މީސްމީޑިއާގައި ހިއްސާކުރެއްވި މެސެޖެއްގައި މެޑަމް ސާޖިދާ ވިދާޅުވީ، ނަފުސާނީ ދުޅަހެޔޮކަން ބިނާވަނީ ލިބޭ އަޅާލުމާއި، ދިރިއުޅޭ މުޖުތަމައުތަކާއި، ވަށައިގެންވާ މީހުންގެ ސަބަބުން ކަމަށެވެ. އަދި ގޭތެރެއާއި ސްކޫލުތަކާއި މަސައްކަތުގެ މާހައުލުތަކުގައި ކޮންމެ ދުވަހަކުވެސް ނަފުސާނީ ދުޅަހެޔޮކަމަށް އަސަރުކުރާ ކަންކަން ހިނގަމުންދާއިރު، އެކަކު އަނެކަކަށް އަޑުއަހައި އެހީތެރިކަން ފޯރުކޮށްދިނުމަކީ ބޮޑު ބަދަލެއް ގެނެސްދޭނެ ކަމެއް ކަމަށް އެކަމަނާ ފާހަގަކުރެއްވިއެވެ.

Ad by Hajj Corporation

މީގެއިތުރުން، ނަފުސާނީ ގޮންޖެހުންތައް ތަހައްމަލުކުރަމުންދާ ފަރާތްތަކަކީ ހަގީގީ އެހީތެރިކަން ދޭންވީ ގޮތުގެ އަގުހުރި ވިސްނުމާއި ތަޖުރިބާ ހުރި ބައެއްކަން ބަލައިގަންނަންޖެހޭ ކަމަށް މެޑަމް ސާޖިދާ ވިދާޅުވިއެވެ. އަދި ނަފުސާނީ ސިއްހަތާ މެދު ގެންގުޅޭ ވިސްނުމާއި ބޭނުންކުރާ ބަސްމަގު ބަދަލުކުރުމާއެކު، އެހީތެރިކަން ހޯދުމަށް ފަރުދުންނަށް ހިތްވަރުދީ، ބޭނުންވާ ކޮންމެ މީހަކަށްވެސް އެހީތެރިކަން ލިބެން ހުރިކަމުގެ ހޭލުންތެރިކަން އިތުރުކުރަންޖެހޭ ކަމަށް ވިދާޅުވިއެވެ.

ފަސްޓްލޭޑީގެ މެސެޖު ނިންމަވާލައްވަމުން ވަނީ، ނަފުސާނީ ބަލިތަކާ ގުޅިގެން މީހުންނާމެދު ދެކޭ ނޭދެވޭ ތަފާތުކުރުންތަކާއި ލަދުވެތިކަން ނައްތާލައި، އެންމެންގެ އަޑުވެސް އަހައި އަޅާލުން ލިބޭނެ ފަދަ މާހައުލެއް ބިނާކުރުމަށް ގޮވާލައްވާފައެވެ.