ލަ ލީގާގެ ރައީސް ޖަވިއަރ ޓެބާސް ވަނީ މެންޗެސްޓަރ ސިޓީން ފައިނޭންޝަލް ފެއަރ ޕްލޭ (އެފްއެފްޕީ) ގެ ގަވާއިދުތަކާ ޚިލާފުވަމުންދާ ކަމަށް ތުހުމަތުކޮށްފައެވެ. އޭނާ ބުނާ ގޮތުގައި ސިޓީން ވަނީ އެފިލިއޭޓެޑް ކުންފުނިތަކުގެ ޚަރަދުތައް ފޮރުވައިގެން މާލީ މަކަރު ހަދަމުން ގެންގޮސްފައެވެ.

ފައިނޭންޝަލް ޓައިމްސްގެ "ބިޒްނަސް އޮފް ފުޓްބޯލް ސަމިޓް" ގައި ވާހަކަދައްކަމުން ޓެބާސް ވަނީ މި މައްސަލަ ޔޫރަޕިއަން ކޮމިޝަނަށް ހުށަހަޅާފައިވާ ކަމަށް ބުނެފައެވެ. އޭނާ ބުނާ ގޮތުގައި ސިޓީން ވަނީ ސިޓީ ފުޓްބޯލް ގްރޫޕްގެ ރަސްމީ ބައެއް ނޫން ކުންފުނިތައް ބޭނުންކޮށްގެން މާލީ ގެއްލުންތައް ފޮރުވާފައެވެ. މިއީ 2001 ވަނަ އަހަރު އެންރޯން ކުންފުނި ބަނގުރޫޓުވުމުގެ ކުރިން އެ ކުންފުނިން ސަބްސިޑިއަރީތައް މެދުވެރިކޮށް ގެއްލުން ފޮރުވި ގޮތާ އެއްފަދަ ކަމެއް ކަމަށް އޭނާ ބުނެފައިވެއެވެ.

"ސްކައުޓިންގ އަދި މާކެޓިންގ ކުންފުނިތައް މެދުވެރިކޮށް ޚަރަދުތައް އިތުރުކޮށް، ސިޓީން އެ ކުންފުނީގެ މާލީ ޚަރަދުތައް ކުޑަކޮށް ދައްކަމުން ގެންދަނީ،" ޓެބާސް ބުނެފައިވެއެވެ.

މި ތުހުމަތުތަކާ ގުޅޭ ގޮތުން މެންޗެސްޓަރ ސިޓީން އެއްވެސް ކޮމެންޓެއް ކޮށްފައެއް ނުވެއެވެ. ނަމަވެސް ޕްރިމިއަރ ލީގުން މިހާރުވެސް ދަނީ އެ ކުލަބުން މާލީ ގަވާއިދުތަކާ ޚިލާފުވެފައިވާ ކަމަށް ބުނެ ކުރެވޭ 115 ތުހުމަތެއް ތަހުގީގުކުރަމުންނެވެ. ހުކުމް ކުރުމާއި ގާތުގައި އޮތް މިމައްސަލަ ސިޓީގެ މައްޗަށް ސާބިތުވެއްޖެނަމަ ބޮޑު އަދަދުތަކުން ޖޫރިމަނާ ކުރުމާއެކު އެކުލަބު ރެލިގޭޓް ކުރާނެކަމަށް ފުޓްބޯޅަ ދިރާސާކުރާ ފަރާޓްތަކުން ޤަބޫލުކުރެއެވެ.

2023 ވަނަ އަހަރުގެ ޖުލައި މަހު ނެރުނު ރޫލިންގއަކާ ގުޅިގެން، ޔޫރަޕިއަން ޔޫނިއަނަށް ވަނީ ސަރުކާރުގެ އެހީ ލިބޭ ކުންފުނިތަކުގެ މާލީ ހަރަކާތްތައް ބެލުމުގެ ބާރު ލިބިފައެވެ. އެހެންކަމުން ޓެބާސް ވަނީ ސިޓީގެ މާލީ ހަރަކާތްތައް ބެލުމަށް ޔޫރަޕިއަން ޔޫނިއަނަށް ގޮވާލާފައެވެ.