ޔުއެފާ ޗެމްޕިއަންސް ލީގުގެކުއާޓަރ ފައިނަލުގެ ފުރަތަމަ ލެގުގައި ރޭ ފެޔަނޫޑާ ދެކޮޅަށް ކުޅުނު މެޗުން އިންޓަރ މިލާން 2-0 ގެ ނަތީޖާއަކުން މޮޅުވެއްޖެއެވެ.

ފެޔަނޫޑްގެ ދަނޑުގައި ކުޅުނު މި މެޗުގައި އިންޓަރ މިލާނުން ވަނީ މެޗު ފެށުނީއްސުރެ ވަރުގަދަ ކުޅުމެއް ދައްކާފައެވެ.މެޗުގެ ފުރަތަމަ ލަނޑު އިންޓަރ މިލާނަށް ކާމިޔާބުކޮށްދިނީ ފުރަތަމަ ހާފުގެ ކުޅުން ނިމެން 8 މިނިޓަށް ވެފައިވަނިކޮށް މާކަސް ތުރާމް އެވެ. އެއީ ނިކޯލޯ ބަރެއްލާގެ ބޯޅައަކުން ލިބުނު ފުރުސަތަކުންނެވެ. އަދި ފުރަތަމަ ހާފުގެ ފަހު މިނިޓުގައި ކްރިސްޓިއަން އަސްލާނީގެ ހިލޭ ޖެހުމަކުން އިންޓަރ މިލާނަށް ލިބުނު ރަނގަޅު ފުރުސަތެއް ފެޔަނޫޑްގެ ކީޕަރު ވަނީ ރައްދުކޮށްފައެވެ.

ދެވަނަ ހާފުގެ ކުޅުން ފެށިތާ 5 މިނިޓުގައި އިންޓަރ މިލާނުގެ ކެޕްޓަން ލައުޓާރޯ މާޓިނޭޒް ވަނީ އެ ޓީމުގެ ދެވަނަ ލަނޑު ޖަހާފައެވެ. މިއީ މި ސީޒަނުގެ ޗެމްޕިއަންސް ލީގުގައި އޭނާ ޖެހި ހަވަނަ ލަނޑެވެ. އަދި މި ލަނޑާއެކު މާޓިނޭޒް ވަނީ އިންޓަރ މިލާނަށް ޔޫރަޕްގެ މުބާރާތްތަކުގައި އެންމެ ގިނަ ލަނޑު ޖެހި ކުޅުންތެރިޔާގެ ރެކޯޑު އަމިއްލަ ކުރިއެވެ.މެޗުގެ ތެރޭގައި އިންޓަރ މިލާނަށް ލިބުނު ޕެނަލްޓީ ކިކެއް ޒިއެލިންސްކީ ޖެހި ނަމަވެސް، ފެޔަނޫޑްގެ ކީޕަރު ވަނީ އެ ޕެނަލްޓީ ހުއްޓުވާލާފައެވެ.

މި ދެ ޓީމުގެ ދެވަނަ ލެގުގެ މެޗު ކުޅޭނީ އަންނަ އަންގާރަ ދުވަހު މިލާނުގެ ސެންސީރޯ ސްޓޭޑިއަމްގައެވެ.