މަޝްވަރާތައް ކުރިއަށްދަނިކޮށް ޣައްޒާއިން ކަރަންޓް ކަނޑާލައިފި


10 މާރިޗު 2025 - 08:26
ސުލްހައިގެ މަޝްވަރާތައް ކުރިއަށްދަނިކޮށް ޣައްޒާއަށް ފޯރުކޮށްދެމުން އައި ކަރަންޓު އިސްރާއީލުން ކަނޑާލައިފިއެވެ.
ސުލްހައިގެ މަޝްވަރާތަކަށް އިސްރާއީލުގެ ވަފުދެއް މިއަދު ދޯހާއަށް ދަތުރުކުރުމަށް ހަމަޖެހިފައިވާއިރު، މިސުރު، ޤަތަރު އަދި އެމެރިކާ މެދުވެރިއެއްގެ ރޯލު އަދާކޮށް ހަނފުރާމަ ހުއްޓާލުމުގެ އެއްބަސްވުމަކަށް އައުމަށް މަސައްކަތްކުރާނެކަމަށް ރިޕޯޓުތައް ބުނެއެވެ.
ކަރަންޓު ކަނޑާލުމާ ގުޅިގެން ހަމާސް ބުނީ މިއީ ވަރަށް އާދައިގެ ކަމެއްކަމަށާއި މިކަމުގެ ސަބަބުން އަޒުމަކަށް ބަދަލެއް ނާންނާނެކަމަށެވެ. މި ދަނޑިވަަޅަކީ ފަލަސްޠީނުގެ ޣައްޒާގައި ވެރިކަންކުރާ ޙަމާސް ޖަމާޢަތާއި އެމެރިކާގެ ރަހީނުން މިނިވަންކުރުމާ ގުޅޭ މަޝްވަރާތައްވެސް ކުރިއަށްދާ ދަނޑިވަޅެެކެވެ.
މީގެ އިތުރުން މިއަދު ހިފާފައިވާ ހުޅަނގު އައްސޭރީގެ ހިބުރޫންގެ ހުޅަނގުން އޮންނަ އިދްނާ ރަށުގައި ދެ މުސްލިމުންގެ ގަޔަށް ބަޑިޖަހާ ވަނީ ޒަހަމްކޮށްލާފައެވެ. އެ މުސްލިމުންނަށް ހަމަލާދިން ސަބަބެއް ޔަހޫދީން ހާމަކޮށްފައެއް ނުވެއެވެ.
ރޭވެސް ހުޅަނގު އައްސޭރީގެ އެކު ސަރަހައްދުތަކުގައި ޔަހޫދީންވަނީ ރެއިޑްތައް ޖަހާ ކުށަކާ ނުލައި ފަލަސްތީނުގެ ރައްޔިތުން ހައްޔަރުކުރުން ކުރިއަށްގެންގޮސްފައެވެ. މިގޮތުން ހިބުރޫން ، ނާބްލުސް، ކަލްކީލިޔާ އަދި ޖެނިން ގައި ރެއިޑްތައް ހިންގާފައިވެއެވެ.
އަދި މީގެ އިތުރުން ބަރަކާތްތެރި ރަމަޟާން މަހު ފަލަސްޠީނުގެ ބައިތުލްމަޤްދިސްގައި ހުންނަ މުސްލިމުންގެ ތިންވަނައަށް އެންމެ މުޤައްދަސް ބިނާ ކަމުގައިވާ މަސްޖިދުލްއަޤްޞާގައި ހުކުރު ނަމާދު ކުރެވޭނެ މީހުންގެ އަދަދު ޔަހޫދީން އަންނަނީ ކޮންޓުރޯލުވެސް ކުރަމުންނެވެ.
އަޤްޞާގައި ކުރާ ހުކުރު ނަމާދުގައި ބައިވެރިވުމުގެ ފުރުޞަތަށް އަނިޔާވެރި ނަތަންޔާހޫގެ އޮފީހުން ހުރަސް އަޅަން ނިންމާފައި މި ވަނީ، ފަލަސްޠީނުގެ ބިންތަކުގައި ވަޒަންވެރި ކޮށްފައިވާ ގިނަ އަދަދެއްގެ ޔަހޫދީން އަޤްޞާ މިސްކިތް ހުންނަ އަލް-ޙަރަމުއްޝަރީފަށް ވަންނަމުންދާ ދަނޑިވަޅެއްގައެވެ.
ބައިތުލްމަޤްދިސަށް ޔަހޫދީން އަތްގަދަ ކޮށްފައި ވަނީ 1967 ވަނަ އަހަރުގެ މެދުއިރުމަތީގެ ހަނގުރާމައިގައެވެ. އެއަށްފަހު, ޔަހޫދީން ދަނީ މުސްލިމުންގެ އެ ބިމުގައި އިސްތިޢުމާރީ ވެރިކަމެއް ހިންގަމުންނެވެ. އަޤްޞާ ވެސް އޮތީ އެ މީހުންގެ ބާރުގެ ދަށުގައެވެ.
އިތުރު ލިޔުންތައް

ފަލަސްތީނުގެ ވޯލްޑް ކަޕް ޑްރީމް: ހަނގުރާމައިގެ ތެރޭގައި އުއްމީދުގެ އަލިކަމެއް
7 މަސް ކުރިން
އިޒްރޭލް ޕާސްޕޯޓް މަނާ ކުރުމުގެ މަސައްކަތް މަޖިލީހުގެ އަންނަ ދައުރުގައި ފަށާނެ : ހީނާ
7 މަސް ކުރިން
އިސްރާއީލުން ފަލަސްތީނުގެ އިތުރު 24 މީހުން ޝަހީދުކޮށްލައިފި
7 މަސް ކުރިން