ރަފީނިޔާގެ ދެ ގޯލާއެކު ޗެމްޕިއަންސް ލީގުގެ ގަދަ 16 ގެ ދެވަނަ ލެގުގައި ބާސެލޯނާ ބެންފީކާ ވަނީ 3-1 އިން ބަލިކޮށް މުބާރާތުގެ ކުއާޓަރ ފައިނަލަށް ދަތުރުކޮށްފިއެވެ. ރޭގެ މޮޅާއެކު އެގްރެގޭޓް ސްކޯރ 4-1 އިން ބާސެލޯނާ ވަނީ މޮޅުވެފައެވެ. މީގެކުރިން ފުރަތަމަ ލެގުގައި ބެންފީކާގެ ދަނޑުގައި ބާސެލޯނާ ވަނީ 1-0 އިން ބެންފީކާ ބަލިކޮށްފައެވެ.ރޭގެ މެޗުގައި ޖެހި ދެގޯލާެެކު ރަފީނިޔާ ވަނީ ޗެންޕިއަންދް ލީގުގައި 10 މެޗުން 11 ގޯލުޖަހާފައެވެ. ރޭގެ މެޗުގައި 17 އަހަރުގެ ޒުވާން ކުޅުންތެރިޔާ ލަމީން ޔަމާލް ވެސް ވަނީ ގޯލަކާއި އެސިސްޓެއް ހަދާފައެވެ.. މިއާއެކު ޗެމްޕިއަންސް ލީގުގެ އެއް މެޗެއްގައި ގޯލާއި އެސިސްޓް ހޯދި އެންމެ ހަގު އުމުރުގެ ކުޅުންތެރިޔާއަށް ޔަމާލް ވަނީ ވެގެންގޮސްފައެވެ. މެޗުގެ ފުރަތަމަ ގޯލު ޔަމާލްގެ އެސިސްޓަކުން ރަފީނިޔާ ޖެހިއިރު އޭގެ މިނެޓެއްފަހުން ބެންފީކާއިން ވަނީ ނަތީޖާ ހަމަކޮށްފައެވެ. ނަމަވެސް ފުރަތަމަ ހާފުނިމުމުގެ ކުރިން ޔަމާލް އާއި ރަފީނިޔާ ވަނީ އިތުރު ގޯލެއް ޖަހައި މެޗުގެ ކޮންޓްރޯލް ހޯދައި ބާސެލޯނާ ކުއާޓަރ ފައިނަލަށް ގެންގޮސްދީފައެވެ.

މި ސީޒަންގައި ބާސެލޯނާއަށް މުހިންމު ތިން މުބާރާތެއް (ޓްރެބްލް) ކާމިޔާބުކުރުމުގެ ފުރުސަތު އަދިވެސް އެބައޮތެވެ. ބާސެލޯނާ މިވަގުތު ވަނީ ލަ ލީގާގެ އެއްވަނައިގައި އަދި ކޯޕާ ޑެލް ރޭގެ ސެމީ ފައިނަލަށްވެސް ގޮސްފައެވެ. ޔޫރަޕުގެ ގަދަ 5 ލީގުގައި 2025 ވަނަ އަހަރުގައި އެއްވެސް މެޗަކުން ބަލިނުވާ ހަމައެކަނި ޓީމަކީވެސް ބާސެލޯނާއެވެ.