ޔުއޭފާ ޗެންޕިއަންސް ލީގުގައި ގަދަ 16 ގައި ދެވަނަ ލެގުގައި ޕީއެސްޖީ އަތުން ބަލިވެ، ލިވަރޕޫލް މުބާރާތާއި އަލްވަދާޢުކިޔާފިއެވެ. ލިވަރޕޫލްގެ އަމިއްލަ ދަމޑުގައި ކުލެވުނު މިމެޗުގެ ފުރިހަމަ ވަގުުތ ހަމަވީ 1-0 އިން ޕީ.އެސް.ޖީ ކުރީގައި އޮވެގެންނެވެ. އެހެންކަމުން އެގްރިގޭޓް 1-1 އިން އެއްވަރުވެފައި އޮތުމުން މެޗުގެ ނަތީޖާ ނެރެންޖެހުނީ ޕެނަލްޓީ ޖަހައިގެންނެވެ.މީގެކުރިން މިދިޔަ ހަފްތާގައި މިދެޓީމު ފްރާންސް ގައި ކުޅުނު ފުރަތަމަ ލެގުގައި ލިވަރޕޫލް 1-0 އިން މޮޅުވެފައި އޮތުމުން، އެޓީމުން އަމިއްލަ ދަމޑުގައި ނިކުތީ މޮޅުވާނެކަމުގެ އުންމީދުގައެވެ. އެހެންކަމުން އަމިއްލަ ދަމޑުގައި މެޗު އެއްވަރުކޮށްލައިގެން ކުއާޓަރ ފައިނަލަށް ދަތުރުކުރުމުގެ ފުރުސަތު ރޭގެ މެޗަށް ނިކުތްއިރު ލިވަރޕޫލަށް ވަނީ ލިބިފައެވެ.

އާނެ ސްލޮޓް ގެ އިރުޝާދުގެ ދަށުން ފުރަތަމަ ސީޒަނުގައި 3 ތަށި ނެގުމުގެ އުއްމީދުގައި ތިބި ލިވަރޕޫލްގެ ސަޕޯޓަރުންގެ ހުވަފެނުގައި ހިޔަނިއެޅުނީ މެޗުގެ 12 ވަނަ މިނެޓުގައި ލިވަރޕޫލްގެ ޑިފެންޑަރ ކޮނާޓޭ އަށް ހެދުނު ގޯހަކާއި ގުޅިގެން ޕީއެސްޖީގެ އުސްމާން ޑެންބެލޭ އަށް ހުސްކޮށް ލިބުނު ބޯޅައަކުންނެވެ. މެޗުގެ 90 މިނެޓުހަމަވިއިރު އެގްރިގޭޓް އެއްވަރުވެފައި އޮތުމުން އިތުރު ވަގުތުގެ 30 މިނެޓުގައިވެސް ޓީމަކަށް ނަތީޖާއެއް ނެރެވޭގޮތް ވަނީ ނުވެފައެވެ.

ރޭގެ ޕެނަލްޓީގައި ލިވަރޕޫލްގެ ދެ ޕެނަލްޓީއެއް ޕީއެސްޖީގެ ޑޮނަރުމާ ހިފަހަށްޓާފައިވާއިރު، ޕީއެސްޖީގެ ހުރިހާ ޕެނަލްޓީއެއް އެޓީމުން ވަނީ ކާމިޔާބުކޮށްފައެވެ.ރޭގެ ބައްޔާއެކު މިސީޒަނުގައި ބެލަންޑިއޯ ލިބޭނެކަމަށް އެންމެ ގިނަބަޔަކު ޤަބޫލުކުރަމުން ގެންދިޔަ ސަލާޙުގެ ހުވަފެނުގައި ވަނީ ހިޔަނި އެޅިފައެވެ. މިސީޒަނުގައި ސަލާޙުގެ ފަރާތުން މޮޅުކުޅުމެއް ފެނުނުނަމަވެސް ޔޫރަޕް ފުޓްބޯޅައިގެ އެންމެ ހައިބަތު ބޮޑު މިމުބާރާތުން މިހާ އަވަހަށް އަލްވަދާޢުކިޔަންޖެހިފައިވުމުން، މިއެވޯޑް އޭނާއަށް ހާސިލް ކުރުމަކީ އުނދަގޫކަމަކަށް ވެގެންދާނެއެވެ.