މައިންބަފައިން ސިޔާސީ މަސައްކަތުގައި އުޅުމަކީ އެމީހުންގެ ދަރިންނާ ދިމާކޮށް ފުރައްސާރަކުރަންޖެހޭ ސަބަބެއް ނޫން ކަމަށް ރީޖަނަލް އެއަރޕޯޓްސްގެ މެނޭޖިންގ ޑިރެކްޓަރ އަދި ކުރީގެ މަޖިލިސް މެންބަރު އަޙްމަދު މުބީން ވިދާޅުވެއްޖެއެވެ.

މިއަދު ސޯޝަލް މީޑިއާގައި ކުރެއްވި ޕޯސްޓެއްގައި މުބީން ވިދާޅުވީ، "މައިންބަފައިން ސިޔާސީ މަސައްކަތުގައި އުޅުމަކީ ދަރިންނާ ދިމާކޮށް ފުރައްސާރަކުރަންޖެހޭ ކަމެއް ނޫން. އެބައިމީހުންނަކީ އަބަދުވެސް އިންސާނީ ކަރާމާތަށް އަރައިގަންނަ، ނާތަހުޒީބު، އަނިޔާވެރި ބައެއް" ކަމަށެވެ.

މުބީން މިހެން ވިދާޅުވެފައި މި ވަނީ އިދިކޮޅު އެމްޑީޕީން ހިންގަމުންދާ މުޒާހަރާއެއްގައި ބައިވެރިއަކު ކުޑަކުއްޖެއްގެ ކަރާމާތަށް އުނިކަން އަންނަ ގޮތަށް ވާހަކަދައްކައި، އެ، އެ ކުއްޖާގެ އަބުރަށް ގެއްލުން ދިނުމާ ގުޅިގެންނެވެ. މި ޢަމަލު ވަނީ މިނިވަން ކޮމިޝަންތަކާއި، ޖެންޑަރ މިނިސްޓްރީ އަދި ސަރުކާރުގެ އިސްވެރިންނާއި ގިނަ އަދަދެއްގެ އާންމުން ކުށްވެރިކޮށްފައެވެ.

އިޖުތިމާޢީ އަދި ޢާއިލީ ތަރައްޤީއާ ބެހޭ ވުޒާރާއިން ވަނީ ކުޑަކުދިންގެ ޒާތީ މަޢުލޫމާތު ދެނެގަނެވޭނެ ފަދަ މަޢުލޫމާތާއި، ކުޑަކުދިންގެ ކަރާމާތަށް އުނިކަން އަންނަ ފަދަ މަޢުލޫމާތު އާންމުނުކުރުމަށް އެދިފައެވެ.