ވެލާނާ އިންޓަނޭޝަނަލް އެއާޕޯޓްގެ އައު ޓާމިނަލް ހުޅުވުމަށް ތައްޔާރުވަމުންދާއިރު، އެއާޕޯޓްގެ މުވައްޒަފުން ކުރަމުންދާ ބުރަ މަސައްކަތަށް ހިތްވަރު ދިނުމުގެ ގޮތުން ރީޖަނަލް އެއާޕޯޓްސް ކޮމްޕެނީ ލިމިޓެޑްގެ ފަރާތުން އެޓާމިނަލްއަށް ދެކުމާގޮސްފިއެވެ.

ދިވެހި އާދަކާދައިގެ ތެރޭގައި ބޮޑެތި މަސައްކަތްތައް ނިންމުމަށްފަހު، އެކަމަށް ތަރުހީބު ދިނުމުގެ ގޮތުން ގިނަ ބަޔަކު އެއްވެގެން ހަދިޔަ ހިފައިގެން ދިއުމަށް ކިޔަނީ ދެކުމާދިއުމެވެ. މިއީ ރާއްޖޭގެ އެކި ހިސާބުތަކުގައި މިހާރުވެސް ކުރަމުން އަންނަ އާދައެކެވެ.

Ad by Hajj Corporation

ރީޖަނަލް އެއާޕޯޓްސްގެ މެނޭޖިން ޑިރެކްޓަރ އަހްމަދު މުބީން ، ތާރީޚަށް އަލިއަޅުވާ ވިދާޅުވީ އެންމެ ފުރަތަމަ ރާއްޖޭގައި އެއަރޕޯޓެއްތަރައްގީ ކުރި އިރުވެސް ގިނަބަޔަކު ދެކުމާ ދިޔަކަމަށެވެ.

"ދިވެހީންނަކީ އެއްބައިވަންތަ ބައެއްކަން މިފަދަ ވަގުތުތަކުގައި ފެނިގެންދޭ. އެގޮތުން މިއީ އެމްއޭސީއެލްގެ މުވައްޒަފުންގެ މަސައްކަތުގެ އަގު ވަޒަންކުރުމުގެ ގޮތުން ވަރަށް ކުޑަކަމެއް"  މުބީން ވިދާޅުވިއެވެ.

ސަގާފީ ހަރަކާތްތަކާއި އެކު ފަރިވަޅު ހިފައިގެން އާރްއޭސީއެލްގެ މުވައްޒަފުން އާޓާމިނަލަށް ދިއުމުން، އެޓާމިނަލްއިން، އެމްއޭސީއެލްގެ މެނޭޖިން ޑިރެކްޓަރާއި ޑެޕިއުޓީ މެނޭޖިން ޑިރެކްޓަރުންގެ އިތުރުން ވެރިންނާއި މުވައްޒަފުން ވަނީ މަރުޚަބާވިދާޅުވެފައެވެ.

މި ހަރަކާތުގެ ތެރެއިން ވެލާނާ އިންޓަނޭޝަނަލް އެއާޕޯޓްގެ އައު ޓާމިނަލްގައި މަސައްކަތްކުރާ މުވައްޒަފުންނަށް ހިތްވަރު ދީ، އެމްއޭސީއެލްގެ އެމްޑީ ވަނީ އެ މުވައްޒަފުންގެ އަގު ވަޒަންކުރައްވާފައެވެ.