ވެލާނާ އިންޓަނޭޝަނަލް އެއަރޕޯޓް، ވިއައިއޭގެ ސީޓުއެއާ ކާގޯ ހިދުމަތް އިތުރަށް ފުޅާކޮށް ކެމްބޯޑިއާ އިން ކަނޑުމަގުން ގެންނަ މުދާ ވައިގެ މަގުން އެހެން މަންޒިލްތަކަށް ފޮނުވައި ދިނުމުގެ ހިދުމަތް ފަށާފައިވާ ކަމަށް އެމްއޭސީއެލް އިން ބުނެފި އެވެ.

ސީޓުއެއާ ކާގޯގެ ހިދުމަތް ފޯރުކޮށްދެމުން އަންނަނީ މޯލްޑިވްސް އެއާޕޯޓްސް ކޮމްޕެނީ ލިމިޓެޑް، އެމްއޭސީއެލްއާ މޯލްޑިވްސް ޕޯޓްސް ލިމިޓެޑް، އެމްޕީއެލް ގުޅިގެންނެވެ. މި ހިދުމަތް ފަށާފައި ވަނީ 2024 ވަނަ އަހަރުގެ މޭ މަހުގެ ތެރޭގަ އެވެ.

Ad by Hajj Corporation

ކެމްބޯޑިއާއިން މިގޮތަށް މުދާ ގެންނަން ފެށުމުން އެމްއޭސީއެލްގެ މިހިދުމަތް މިހާރު ހަތަރު ގައުމަކަށް ވަނީ ފުޅާވެފަ އެވެ. އެއީ އަވަށްޓެރި އިންޑިއާ، ސްރީލަންކާ، ބަންގްލަދޭޝް އިތުރުން ކެންބޯޑިއާ އެވެ. އެގޮތުން ކެމްބޯޑިއާ އިން ރާއްޖެ ގެނައި ފުރަތަމަ ޝިޕްމެންޓް ވައިގެ މަގުން ގަތަރު އެއާވޭސް މެދުވެރިކޮށް ވަނީ ފޮނުވާލާފަ އެވެ. މިގޮތަށް ކެމްބޯޑިއާ އިން ގެންނަ މުދާ ފޮނުވާލަނީ ސީއީއެފް ލޮޖިސްޓިކްސް މެދުވެރިކޮށެވެ.

އެމްއޭސީއެލް އިން ބުނީ ކެމްބޯޑިއާއިން ރާއްޖެއަށް އަދި ރާއްޖެއިން ޔޫރަޕްގެ މަންޒިލްތަކަށް ވައިގެ މަގުން މުދާ އުފުލުމަކީ އޭޝިއާ އާއި ޔޫރަޕްގެ ގައުމުތަކާއި ގުޅުވާލުމަށް ރާއްޖެއިން އަދާކުރާ ދައުރަށް ލިބުނު މުހިއްމު ކުރިއެރުމެއް ކަމަށެވެ. ތަފާސްހިސާބުތަކުން ދައްކާ ގޮތުން މިދިޔަ މަހު، ސީޓުއެއާ ކާގޯ ހިދުމަތް މެދުވެރިކޮށް، 335 ޓަނުގެ މުދާ ރާއްޖެއިން ބޭރަށް ފޮނުވާފައިވެ އެވެ.

އެމްއޭސީއެލް އިން ބުނީ މިއީ ވަރަށް ގިނަ ގައުމުތަކުން ދެމުން އަންނަ ހިދުމަތެއް ކަމަށާއި ރާއްޖެއަކީ ބައިނަލްއަގްވާމީ ގިނަ އެއާލައިންތަކެއްގެ މަންޒިލަކަށްވާއިރު، ރާއްޖޭގައި މިހިދުމަތް ފުޅާކުރުމުގެ ފުރުސަތު ބޮޑު ކަމަށެވެ.