ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ވަޢުދުފުޅާ އެއްގޮތަށް، ހަތަރު ރަށެއްގެ ކުޅިވަރު ވަސީލަތްތައް ތަރައްޤީކުރުމުގެ މަޝްރޫޢުތަކެއް ރޯޑް ޑިވެލޮޕްމަންޓް ކޯޕަރޭޝަން (އާރުޑީސީ) އާ މިއަދު ވަނީ ހަވާލުކޮށްފިއެވެ.

މި މަޝްރޫޢުތަކުގެ ދަށުން އދ. ހަންޏާމީދޫ އާއި ބ. މާޅޮހުގެ ފުޓްބޯޅަ ދަނޑު ތަރައްޤީކުރުމުގެ މަސައްކަތާއި، އއ. ތޮއްޑޫގެ އިންޑޯ ބެޑްމިންޓަން ކޯޓު ނިންމުމުގެ މަސައްކަތް ހިމެނެއެވެ. މީގެއިތުރުން ކ. ކާށިދޫގެ ފުޓްބޯޅަ ދަނޑަށް ބޭނުންވާ ޑްރެގް ބްރަޝް މެޝިން ހޯދުމުގެ މަސައްކަތްވެސް މި މަޝްރޫޢުތަކުގެ ތެރޭގައި ހިމެނެއެވެ.

ފާހަގަކޮށްލެވޭ ކަމަކީ، ސަރުކާރުގެ ހިއްސާވާ ކުންފުނިތަކާ ހަވާލުކޮށްގެން ކުޅިވަރުގެ މަޝްރޫޢުތައް ފުރިހަމަކުރުމަށް ރައީސުލްޖުމްހޫރިއްޔާ ވަޢުދުވެވަޑައިގެންފައިވާތާ މަހެއްހާ ދުވަހުގެ ތެރޭގައި މި މަޝްރޫޢުތަކުގެ އަމަލީ މަސައްކަތްތައް ފެށުމަށް ހަވާލުކުރެވިފައިވުމެވެ.މި މަޝްރޫޢުތަކުގެ ސަބަބުން އެކި ރަށްރަށުގެ ޒުވާނުންނަށް ކުޅިވަރުކުޅުމުގެ ފުރުސަތުތައް އިތުރުވެ، ކުޅިވަރުގެ ދާއިރާއިން ކުރިއެރުން ހޯދުމަށް މަގުފަހިވެގެންދާނެ ކަމަށް ބެލެވެއެވެ.