ސްޕެއިންގެ ލަލީގާގައި ވިލަރެޔާލް 7 އަހަރުފަހުން ބަލިކޮށް ރެއާލް މެޑްރިޑް ތާވަލުގެ އެއްވަނައަށް އަރައިފިއެވެ. ރޭގައި ވިޔަރެއާލް ދަނޑުގައި ކުޅެވުނު މިމެޗު ރެއާލް މެޑްރިޑުން ކާމިޔާބުކުރީ 2-1 އިންނެވެ. އެންމެ ފަހުން ލީގުގައި ރެއާލް މެޑްރިޑަށް ވިލަރެއާލް ގެ ދަނޑުގައި އެޓީމު ބަލިކުރެވިފައިވަނީ 2017 ވަނަ އަހަރުގައެވެ.

ރެއާލް މެޑްރިޑް ވަނީ މިހާތަނަށް ކުޅުނު 28 މެޗުން 60 ޕޮއިންޓް ހޯދައި، ލީގުގެ އެއްވަނައިގައެވެ. ދެވަނައިގައި އޮތް ބާސެލޯނާ އަށް 26 މެޗުން ލިބިފައިވަނީ 57 ޕޮއިންޓެވެ. މި މެޗުން ބަލިވި ވިޔަރެއާލް އަށް 27 މެޗުން 44 ޕޮއިންޓް ލިބި، އެ ޓީމު އޮތީ ފަސްވަނަ މަގާމުގައެވެ.

ވިޔަރެއާލްގެ ދަނޑުގައި 20،000 އަށް ވުރެ ގިނަ ކުޅިވަރު ސަޕޯޓަރުންގެ ކުރިމަތީގައި ކުޅުނު މި މެޗުގެ ހަތްވަނަ މިނިޓުގައި ވިޔަރެއާލްގެ ހުއާން ފޮއިތް ވަނީ ލަނޑެއް ޖަހައި އެ ޓީމަށް ކުރި ހޯދައިދީފައެވެ. ނަމަވެސް ދިހަ މިނިޓު ފަހުން ރެއާލް މެޑްރިޑްގެ ކިލިއަން އެމްބާޕޭ ވަނީ ލަނޑެއް ޖަހައި މެޗުގެ ނަތީޖާ އެއްވަރުކޮށްފައެވެ.މެޗުގެ 23 ވަނަ މިނިޓުގައި އެމްބާޕޭ ވަނީ އޭނާގެ ދެވަނަ އަދި މެޗުގެ މޮޅުވި ލަނޑު ޖަހާފައެވެ. މި ދެ ލަނޑާއެކު މި ސީޒަނުގައި ލަލީގާގައި އެމްބާޕޭ ޖެހި ގޯލުގެ އަދަދު ވަނީ 20 އަށް އަރާފައެވެ. މިއީ ލީގުގައި މިހާތަނަށް އެންމެ ގިނަ ލަނޑު ޖަހާފައިވާ ބާސެލޯނާގެ ރޮބަޓް ލެވަންޑޯސްކީ އަށްވުރެ އެއް ލަނޑު މަދު އަދަދެކެވެ.މެޗުގެ ދެވަނަ ހާފުގައި ވިޔަރެއާލް އިން ވަނީ އެ ޓީމުގެ ކުޅުން ރަނގަޅުކޮށް ރެއާލް މެޑްރިޑްގެ ފަހަތަށް ނުރައްކާކޮށްފައެވެ. އެގޮތުން ރެއާލް ގެ ގޯލާއި އަމާޒުކޮށް 10 ހަމަލާ ފޮނުވާލާފައިވާއިރު، ރެއާލް މެޑްރިޑްގެ ކީޕަރު ވަނީ މިހުރިހާ ހަމަލާއެއް ހުއްޓުވާފައެވެ.ލީގުގައި މިރޭ ބާސެލޯނާ އާއި އެތްލެޓިކޯ ބައްދަލުކުރާ މެޗުން ބާސެލޯނާ މޮޅުވެއްޖެނަމަ އެޓީމު ތާވަލުގެ އެއްވަނައަށް އަރާނެއެވެ.