އިނގިރޭސި ޕްރިމިއަރ ލީގުގައި މިރޭ ކުޅުނު މެޗެއްގައި މެންޗެސްޓަރ ސިޓީ އާއި ބްރައިޓަން 2-2 އިން އެއްވަރުވެއްޖެއެވެ. އިއްތިހާދު ސްޓޭޑިއަމްގައި ކުޅުނު މި މެޗުގައި ސިޓީން ގިނަ އިރު ބޯޅަ ހިފަހައްޓައިގެން ކުޅުނު ނަމަވެސް، ދެ ޓީމަށް ވެސް ލިބުނު ފުރުސަތުތައް ދާދި އެއްވަރުވިއެވެ.

މެޗުގެ ފުރަތަމަ ލަނޑު ޖެހީ 11 ވަނަ މިނެޓުގައި ސިޓީގެ ސްޓްރައިކަރު އާލިން ހާލަންޑެވެ. އޭނާ މި ލަނޑު ޖެހީ ޕެނަލްޓީއަކުންނެވެ. މި ލަނޑާއެކު ހާލަންޑަކީ ޕްރިމިއަރ ލީގުގައި 100 މެޗަށްވުރެ މަދު މެޗުކުޅެ، 100 ލަނޑު ޖެހުމުގައި ބައިވެރިވި (ގޯލާއި އެސިސްޓާއެކު) ފުރަތަމަ ކުޅުންތެރިޔާއަށް އޭނާ ވަނީ ވެފައެވެ. ފުރަތަމަ ކުޅުންތެރިޔާއަށް ވެފައިވެއެވެ.މިހާތަނަށް ހާލަންޑު ޕްރިމިއަރ ލީގުގައި ކުޅުނު 94 ވަނަ މެޗުން 84 ގޯލާއި 16 އެސިސްޓް ހަދާދީފައިވެއެވެ.

ހާލަންޑު މެޗުގެ ކުރީކޮޅުގައި ގޯލުޖެހިނަމަވެސް ލީޑުގައި މާގިނައިރަކު ސިޓީއަކަށް ހިފަހަށްޓާނުލެވުނެވެ. މެޗުގެ 21 ވަނަ މިނެޓުގައި ބްރައިޓަންގެ ޕާރވިސް އެސްޓޫޕިނާން ވަނީ ހިލޭ ޖެހުމަކުން ލަނޑެއް ޖަހައި މެޗު އެއްވަރު ކޮށްފައެވެ. އެއަށްފަހު ފުރަތަމަ ހާފު ނިމެން ހަ މިނެޓަށް ވެފައި ވަނިކޮށް އުމަރު މަރްމޫޝް ވަނީ ސިޓީއަށް އަނެއްކާވެސް ކުރި ހޯދައިދީފައެވެ.

ދެވަނަ ހާފުގެ ތިންވަނަ މިނެޓުގައި ބްރައިޓަން ވަނީ އިތުރު ގޯލެއް ޖަހާފައެވެ. އެއީ ޖެކް ހިންޝެލްވުޑް ހުރަސްކުރި ބޯޅައެއް ދިފާއުކުރަން އުޅުމުގެ ތެރޭގައި ސިޓީގެ އަބްދުކާދިރު ކުސަނޯފް އަތުން ބައިކޮޅަށް ވަތް ގޯލެކެވެ.

މި މެޗު އެއްވަރުވުމާއެކު، 29 މެޗުން 48 ޕޮއިންޓް ހޯދާފައިވާ ސިޓީ އޮތީ ތާވަލުގެ ފަސްވަނަ މަގާމުގައެވެ. އަދި މި ނަތީޖާއާއެކު ޗެމްޕިއަންސް ލީގުގެ ޖާގައެއް ހޯދުމަށް ސިޓީން ކުރަމުންދާ މަސައްކަތަށް ވަނީ ބޮޑު ލޮޅުމެއް އައިސްފައެވެ. 47 ޕޮއިންޓާއެކު ބްރައިޓަން އޮތީ ހަތްވަނަ މަގާމުގައެވެ.