ސުޕްރީމް ކޯޓުގެ ފަނޑިޔާރުންގެ އަދަދު މަދުކުރަން ފާސްކުރި ބިލް ދިރާސާ ކުރަން ކޮމެޓީއަށް


17 މާރިޗު 2025 - 08:09
ސުޕްރީމް ކޯޓުގެ ފަނޑިޔާރުންގެ އަދަދު 5 އަށް މަދުކުރަން ރައްޔިތުންގެ މަޖިލީހުން ފާސްކުރި ބިލު ރައީސުލްޖުމްހޫރިއްޔާ ތަސްދީގު ނުކުރައްވާ އަލުން އަނބުރާ މަޖިލީހަށް ފޮނުވާލެއްވުމުން އެބިލު ދިރާސާ ކުރުމަށް ރައްޔިތުންގެ މަޖިލީހުގެ ޖުޑިޝަރީ ކޮމިޓީއަށް ފޮނުވައިފި އެވެ.
ސުޕްރީމް ކޯޓުގެ ފަނޑިޔާރުންގެ އަދަދު 7 ން 5 އަށް މަދުކުރަން ރައްޔިތުންގެ މަޖިލީހުން ފާސްކުރީ މިދިޔަ ފެބްރުއަރީ މަހުގެ 26 ވަނަ ދުވަހު އެވެ.ބިލު މަޖިލީހުން ފާސްކުރިތާ 13 ދުވަސް ފަހުން ބިލު ތަސްދީގު ނުކުރައްވާ ރައީސުލްޖުމްހޫރިއްޔާ ބިލު އަނބުރާ މަޖިލީހަށް ފޮނުވާލައްވާފައި ވަނީ މިދިޔަ އަންގާރަ ދުވަހު އެވެ.
ރައީސް އެ ބިލު ތަސްދީގު ނުކުރައްވާ އަލުން މަޖިލީހަށް ފޮނުވާލެއްވީ ބިލުގައި ގާނޫނު އަސާސީއާއި ފުށުއަރާ ކަންތައްތަކެއް ހުރި ކަމަށް ބަންޑާރަ ނައިބު ލަފާދެއްވާފައިވާތީ އެވެ. ބަންޑާރަ ނައިބު ރައީށްއަށް ލަފާ އަރުވާފައި ވަނީ އެ ބިލް މިހާރު އޮތްގޮތުން ފަނޑިޔާރުން މަގާމުން ވަކިކުރުމުގެ އުސޫލާ ފުށުއަރާ ކަމަށެވެ.
ބިލް އަލުން ދިރާސާކުރަން ޖުޑީޝަރީ ކޮމެޓީ އަށް ފޮނުވުމަށް ހުށަހެޅުއްވީ ޕީއެންސީގެ ޕީޖީ ލީޑަރު އަދި އިނގުރައިދޫ ދާއިރާގެ މެމްބަރު އިބްރާހިމް ފަލާހެވެ. ބިލު ކޮމެޓީއަށް ފޮނުވީ 50 މެންބަރުންގެ ވޯޓުންނެވެ. ބިލް އަލުން ދިރާސާކުރަން ކޮމިޓީއަށް ފޮނުވުމާ ދެކޮޅަށް ހަތް މެންބަރަކު ވޯޓު ދެއްވި އެވެ.
ރައްޔިތުންގެ މަޖިލީހުގެ ތަޅުމުން މި ބިލް އެންމެ ފުރަތަމަ ދިރާސާކުރަން ޖުޑިޝަރީ ކޮމިޓީއަށް ފޮނުވުމުން ކޮމެެޓީން އޭރު ބިލު ފާސްކުރީ އެއްވެސް ބަދަލެއް ނުގެނެސް ބިލް އޮތް ގޮތަށެވެ.
މި ބިލުގައި ހިމަނާފައި ވަނީ މިހާރު ސުޕްރީމް ކޯޓުގައި ތިއްބަވާފަނޑީޔާރުންގެ އަދަދު 7 އިން 5 މަދުކުރުމަށް ވަނީ ހިމަނާފައެވެ.ބިލު ހުށަހެޅުއްވި މެމްބަރު ވިދާޅުވީ މި ބަދަލު ގެންނަނީ ރައްޔިތުން ޝަރުއީ ދާއިރާއަށް ކުރާ އުންމީދުތައް ހަގީގަތަކަށް ހަދައިދީ ހެޔޮ ބަދަލެއް ގެނައުމަށް ކަމަށެވެ. އެ ބަދަލު އެންމެ އެކަށޭނަ ގޮތަކަށް ރައްޔިތުންނަށް ލިބިގެންދާނީ ސުޕްރީމް ކޯޓު އެކުލެވިގެންވާ ގޮތް ކުރިއެކޭވެސް އެއްގޮތަށް ބަދަލުކުރުމުން ކަމަށް ދެކޭތީ ކަމަށެވެ.