ކާބޯތަކެތީގެ ޚިދުމަތްދޭ ތަންތަން ދަފްތަރުކޮށް ރަޖިސްޓްރީކުރުމަށް މޯލްޑިވްސް ފުޑް އެންޑް ޑްރަގް އޮތޯރިޓީ (އެމްއެފްޑީއޭ) އިން އަންގައިފިއެވެ.

އެމްއެފްޑީއޭއިން ގެޒެޓްކޮށްފައިވާ އިއުލާނުގައިވާގޮތުން ކާބޯތަކެތީގެ ރައްކާތެރިކަމުގެ ޤާނޫނަށް ޢަމަލުކުރަން ފެށުމުން ކާބޯތަކެތީގެ ޚިދުމަތްދޭ ތަންތަން ރަޖިސްޓްރީކޮށް ލައިސަންސް ހޯދުމަށް މާލޭގައި ނަމަ އެ އޮތޯރިޓީގައި އަދި އަތޮޅު ތެރޭގައިނަމަ އެރަށެއްގެ ޞިއްޙީ ޚިދުމަތްދޭ މަރުކަޒެއްގައި ރަޖިސްޓްރީ ކުރަންޖެހެއެވެ.

Ad by Hajj Corporation

ރަޖިސްޓްރީ ނުކޮށް ކާބޯތަކެތީގެ ޚިދުމަތްދޭ ތަންތަން ހިންގުމަކީ މަނާކަމެއް ކަމުގައި އެމްއެފްޑީއޭގެ އިއުލާނުގައިވަނީ ބުނެފައެވެ.

ވުމާއެކު އެމްއެފްޑީއޭއިން ވަނީ  ކާބޯތަކެތީގެ ޚިދުމަތްދޭ ހުރިހާ ފަރާތްތައް ރަޖިސްޓްރީ ކުރުމަށް އަންގާފައެވެ.

ކާބޯތަކެތީގެ ހިދުމަތްދޭ ތަންތަނާއި ފަރާތްތައް ރަޖިސްޓްރީކޮށް ލައިސަންސް ދޫކުރުމުގައި އަމަލުކުރާނެ އިންތިގާލީ އުސޫލު ބަޔާންކުރާ ގަވާއިދުގައިވާގޮތުން ދައުލަތުގެ އެހެން އިދާރާއެއްގައި ރަޖިސްޓްރީކޮށްފައިވާ ކާބޯތަކެތީގެ ހިދުމަތްދޭ ތަންތަނާއި އެރަންތަނުގައި އުޅޭ މީހުން ލައިސަންސް ހޯދުމަށް އެމްއެފްޑީއޭއަށް ގިނަވެގެން 6 މަސްދުވަހުގެ ތެރޭގައި ހުށަހަޅަން ޖެހެއެވެ.

ގަވާއިދުގައިވާގޮތުން ރަޖިސްޓްރީނުކޮށް ކާބޯތަކެތީގެ ހިދުމަތްދިނުމުގެ ވިޔަފާރިކުރުމަކީ މަނާކަމެކެވެ. އަދި ރަޖިސްޓްރީ ނުކޮށް ވިޔަފާރިކޮށްފިނަމަ ފުރަތަމަ ފަހަރު 10,000 ރުފިޔާއިން ޖޫރިމަނާކުރުމަށް ކަނޑައަޅާފައިވާއިރު ދެވަނަ ފަހަރު ކުށް ތަކުރާރުކޮށްފި ނަމަ، 100,000 (އެއްލައްކަ) ރުފިޔާއިން ޖޫރިމަނާކުރުން، ތިންވަނަ ފަހަރު ކުށް ތަކުރާރުކޮށްފި ނަމަ، 300,000 (ތިން ލައްކަ) ރުފިޔާއިން ޖޫރިމަނާކުރުން، އަދި ތިންވަނަ ފަހަރަށް އެކަން ތަކުރާރުކުރާ ކޮންމެ ފަހަރަކު، 500,000 (ފަސް ލައްކަ) ރުފިޔާއިން ޖޫރިމަނާކުރުމަށް ވަނީ ކަނޑައަޅާފައެވެ.