ރައްޔިތުންގެ މަޖިލީހުގެ ކޮމިޓީތަކަށް ހާޒިރުކުރުމަށް ދޭ މުއްދަތު 3 ދުވަހަށް ކުރުކުރުމަށް ނިންމައި ރައްޔިތުންގެ މަޖިލީހުގެ ގަވާއިދަށް ހުށަހެޅި އިސްލާހު މަޖިލީހުން ފާސްކޮށްފިއެވެ.

މި އިސްލާހު ހުށަހެޅުއްވީ މަޖިލީހުގެ އިހަވަންދޫ ދާއިރާގެ މެމްބަރު އަހުމަދު ނަސީރެވެ.

މި އިސްލާހު ފާސްކޮށްފައިވަނީ ވޯޓުގައި ބައިވެރިވެވަޑައިގެންނެވި 50 މެމްބަރުންގެ އިއްތިފާގުންނެވެ.

ކުރިން ބަންދު ދުވަސްތައް ނުހިމަނައި މަޖިލީހުގެ ކޮމިޓީތަކަށް ހާޒިރުކުރުމަށް ދޭ މުއްދަތަކީ 5 ދުވަހެެވެ. ނަމަވެސް މިހާރު ބަންދު ދުވަސްތައް ހިމަނައިގެން ތިން ދުވަހުގެ މުއްދަތަށް ވަނީ ކުރުކޮށްފައެވެ.

މި ބިލު އާއްމު ކޮމިޓީން ނިންމިގޮތުގެ ރިޕޯޓް މިއަދުގެ ޖަލްސާއަށް ހުށަހަޅާފައިވާއިރު މި އިސްލާހުގެ ސަބަބުން ކޮމިޓީތަކަށް ބޭނުންވާ މީހުން ހާޒިރުކުރުމަށް ފަސޭހަވެ ކޮމިޓީތަކުގެ މަސައްކަތް އަވަސްވެގެންދާނެކަމަށް ރިޕޯޓުގައިވެއެވެ.