logoEN
ޚަބަރު

ރޯދައިގެ ފަހު 10 އާއެކު، މަޖިލިސް 18 ދުވަހުގެ ޗުއްޓީއަކަށް

ރައްޔިތުންގެ މަޖިލީހުގެ ޖަލްސާއެއްގެ ތެރެއިން -- ފޮޓޯ: މަޖިލިސް

ރައްޔިތުންގެ މަޖިލީހުގެ ޖަލްސާއެއްގެ ތެރެއިން -- ފޮޓޯ: މަޖިލިސް

އަޙްމަދު ސަދޫފް މޫސާއަޙްމަދު ސަދޫފް މޫސާ

19 މާރިޗު 2025 - 07:24

މި ރަމަޟާން މަހުގެ ފަހު 10 ދުވަސްތަކާ އެކު ޖުމްލަ 18 ދުވަހުގެ ޗުއްޓީއަކަށް މަޖިލިސް ގޮސްފިއެވެ.

18 ދުވަހުގެ ޗުއްޓީއަކަށް މަޖިލިސް ދާކަން އިއުލާންކުރެއްވީ މިއަދު އޮތް މަޖިލީހުގެ މި ދައުރުގެ 17 ވަނަ ޖަލްސާ ނިންމަވާލައްވަމުން މަޖިލީހުގެ ރައީސް އަބްދުއްރަހީމް އަބްދުﷲއެވެ.

އެގޮތުން މަޖިލިސް ރައީސް ވިދާޅުވީ، ބަރަކާތްތެރި ރަމަޟާން މަހުގެ ފަހު 10 ދުވަސްތަކާ ބައްދަލުކުރާއިރު، ރައްޔިތުންގެ މަޖިލީހުގެ މެންބަރުންނަކީ ދިވެހި ރައްޔިތުންނަށް ނަމޫނާ ދައްކާ ފަރާތްތަކަށް ވުމަށް އެދޭ ކަމަށެވެ.

"އެމަހުގެ ސަވާބާއި ދަރުމަ އޭގެ އެންމެ ފުރިހަމަ ގޮތުގައި ހޯއްދެވުމަަށްޓަކައި ކެނޑިނޭޅި ހިތްވަރާއި ހިންމަތާއި އިޚްލާސްތެރިކަމާއި ތެދުވެރިކަމާއެކު މަސައްކަތްކުރަމުން ގެންދިޔުން. މި ބަރަކާތްތެރި ރަމަޟާން މަހަކީ، ހުރިހާ ގޮތަކުން ވެސް އަޅުގަނޑުމެންނަށް އުފާ ފާގަތި މައްސަރެއް ކަމުގައި ލައްވައި، އަދި މި މަހުގެ ސަވާބާއި ދަރުމަ އަޅުގަނޑުމެން ހުރިހާ އެންމެންނަށް އެންމެ ފުރިހަމަ ގޮތުގައި ލިބޭނެ ހުރިހައި މަގެއް މާތްﷲ އަޅުގަނޑުމެންނަށް ފަހިކޮށްދެއްވުން އެއީ އަޅުގަނޑުގެ އިޚްލާސްތެރި ދުޢާ،" މަޖިލީހުގެ ރައީސް ވިދާޅުވިއެވެ.

އެއާއެކު މަޖިލިސް ރައީސް ވަނީ، ދެން މަޖިލީހުގެ ޖަލްސާއެއް އޮންނާނީ އަންނަ މަހުގެ 7 ވަނަ ދުވަހުކަން އިއުލާންކުރައްވައި، މިއަދުގެ ޖަލްސާ ނިންމަވާލައްވާފައެވެ.

ރޯދައިގެ ފަހު 10 އަކާއެކު މަޖިލީސް ޗުއްޓީއަކަށް ދިޔައިރު، މި ދައުރުގައި މަޖިލީހުން ވަނީ މުހިންމު ގިނަ މަސައްކަތްކޮށްފައެވެ. އެގޮތުން އެންމެ މުހިންމު މަސައްކަތެއްގެ ގޮތުގައި ސުޕްރީމު ކޯޓުގެ ފަނޑިޔާރުންނާ ގުޅޭ މަސައްކަތްތަކެއް މަޖިލީހުން ކުރިއިރު، އެ ކޯޓުގެ ފަނޑިޔާރުންގެ އަދަދު ހަތަކުން ފަހަކަށް ދަށް ކުރުމަށް މަޖިލީހުން ވަނީ ބިލެއް ފާސްކޮށްފައެވެ.

މިދިޔަ މަހުގެ 25 ވަނަ ދުވަހު މަޖިލީހުން ފާސްކުރި އެ ބިލު ތަސްދީގު ކުރެއްވުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އަށް މަޖިލީހުން ފޮނުއްވުމުން، އެ ބިލު އަލުން ރިވިއުކުރެއްވުމަށް އެދިވަޑައިގެން ރައީސް ވަނީ އެ ބިލު އަނބުރާ ފޮނުއްވާލައްވާފައެވެ.

މީގެ އިތުރުން ސުޕްރީމު ކޯޓުގެ ހުސްވެފައިވާ ފަނޑިޔާރު ކަމުގެ މަގާމަށް ހައި ކޯޓުގެ އިސް ފަނޑިޔާރުގެ މަގާމުގައި ހުންނެވި ހުސައިން ޝަހީދު އައްޔަނުކުރުމަށް ވެސް މަޖިލީހުން ވަނީ ފާސްކޮށްފައެވެ.

ކޮމެންޓް

871x217_placeholder