އިންޑިޔާގެ ޝިލޮންގުގައި މިއަދު ކުޅުނު ބައިނަލްއަގުވާމީ އެކުވެރިކަމުގެ މެޗުގައި ރާއްޖޭގެ ގައުމީ ޓީމް ވަނީ އިންޑިޔާ އަތުން 3-0 ގެ ނަތީޖާއަކުން ބަލިވެއްޖެއެވެ. މިއީ އިންޑިޔާގެ އައު ކޯޗު މަނޯލޯ މާކުއޭޒްގެ އިރުޝާދުގެ ދަށުން އެ ޓީމުން ކުޅުނު ފުރަތަމަ މެޗެވެ.

ޖަވާހިރުލާލް ނެހުރޫ ސްޓޭޑިއަމްގައި ކުޅުނު މި މެޗުގައި އިންޑިޔާގެ ފަރާތުން ފުރަތަމަ ލަނޑު ކާމިޔާބުކޮށްފައިވަނީ މެޗުގެ 35 ވަނަ މިނެޓުގައި ރާހުލް ބޭކޭ ބޮލުން ޖެހި ބޯޅައަކުންނެވެ. އިންޑިޔާގެ ދެވަނަ ލަނޑު ކާމިޔާބުކޮށްފައިވަނީ މެޗުގެ 66 ވަނަ މިނެޓުގައި ލިސްޓަން ކޮލާސޯއެވެ.

މި މެޗުގައި އިންޑިޔާގެ ކެޕްޓަންގެ ގޮތުގައި ކުޅުނު 40 އަހަރުގެ ސުނިލް ޗެތުރީ ވަނީ މެޗުގެ 76 ވަނަ މިނެޓުގައި އިންޑިޔާގެ ތިންވަނަ ލަނޑު ކާމިޔާބުކޮށްފައެވެ. މިއީ ޗެތުރީ ރާއްޖެއަށް ޖެހި އަށްވަނަ ލަނޑެވެ. އަދި އޭނާގެ ބައިނަލްއަގުވާމީ 95 ވަނަ ލަނޑެވެ.

މި މެޗަކީ އޭއެފްސީ އޭޝިއަން ކަޕް ކޮލިފައިންގ ޓުއާނަމަންޓުގެ ކުރިން ދެ ޓީމުން ކުޅުނު އެކުވެރިކަމުގެ މެޗެކެވެ. އޭޝިއަން ކަޕް ކޮލިފައިންގައި އިންޑިޔާއިން މި މަހުގެ 25 ގައި އަމިއްލަ ދަނޑުގައި ބަންގްލަދޭޝްއާ ކުޅޭއިރު، ރާއްޖެއިން އެ ދުވަހު ރަށުން ބޭރުގައި ކުޅޭނީ ފިލިޕީންސްއާ ދެކޮޅަށެވެ.