މިއަހަރުގެ ޓްރާންފަރ މާކެޓްގައި ބާސެލޯނާއިން އެންމެ އިސްކަމެއް ދޭނީ ލިވަޕޫލްގެ ކޮލަމްބިއަން ވިންގަރު ލުއިސް ޑިއާޒް ސޮއިހޯދުމަށްކަމަށް ސްޕޯޓް ނޫހުގެ ރިޕޯޓަރު ޓޮނީ ޖުއަންމާޓީ ހާމަކޮށްފިއެވެ.

ބާސެލޯނާގެ ސްޕޯޓިންގ ޑައިރެކްޓަރު ޑެކޯގެ އެންމެ ބޮޑު އެދުމަކީ ޑިއާޒް ގެނައުން ކަމަށާއި، އަދި މި ކަމާމެދު ކްލަބުގެ ކޯޗު ހާންސީ ފްލިކްގެ އެއްވެސް އިއުތިރާޒެއް ނެތް ކަމަށް ވެސް ވަނީ ހާމަކޮށްފައެވެ.

ނަމަވެސް ޑިއާޒް ގެނައުމުގައި ބާސެލޯނާއަށް ބޮޑެތި ގޮންޖެހުމެއް ކުރިމަތިވާނެ ކަމަށް ވެއެވެ. އޭގެ ތެރޭގައި ލިވަޕޫލްއިން ޑިއާޒް ދޫކޮށްލަން ބޭނުން ނުވުމާއި، ކުޅުންތެރިޔާގެ އަގު 70-75 މިލިއަން ޔޫރޯއާ ހަމައަށް އަރާނެ ކަމަށް ލަފާކުރެވޭކަން ހިމެނެއެވެ.

މީގެ އިތުރުން ޑިއާޒްގެ މުސާރައަށް ޖާގަ ހޯދުމަށް ޓަކައި ބާސެލޯނާއިން މަތީ މުސާރަ ލިބޭ ކުޅުންތެރިއަކު ވިއްކަން ޖެހޭނެ ކަމަށް ވެސް ވަނީ ފާހަގަކޮށްފައެވެ. މިގޮތުން އަންސޫ ފަތީ، ފްރެންކީ ޑި ޔޯންގް ނުވަތަ ރޮނާލްޑް އަރައުހޯ ފަދަ ކުޅުންތެރިއަކު ވިއްކަން ޖެހިދާނެ ކަމަށް ބެލެވެއެވެ.

26 އަހަރުގެ ޑިއާޒްއަކީ 2022 ވަނަ އަހަރު ޕޯޗުގީޒް ކްލަބު ޕޯޓޯއިން ލިވަޕޫލްއަށް ބަދަލުވި ކުޅުންތެރިއެކެވެ. އޭނާގެ މިހާރުގެ އެއްބަސްވުން ލިވަޕޫލްއާއެކު 2027 ވަނަ އަހަރާ ހަމައަށް ދެމިގެންދާނެއެވެ.