އެސްއީޒެޑްގެ ދަށުން ނ. އަތޮޅުގައި ސަސްޓެއިނެބަލް ޓައުންޝިޕް މަޝްރޫއެއް
20 މާރިޗު 2025 - 07:04
ސްޕެޝަލް އިކޮނޮމިކް ޒޯންގެ ދަށުން ނ. އަތޮޅުގައި ސަސްޓެއިނެބަލް ޓައުންޝިޕް މަޝްރޫއެއް ހިންގުމަށް ހުއްދަ ދީފިއެވެ.
ބޯޑް އޮފް އިންވެސްޓްމެންޓުން މި ޕްރޮޖެކްޓު ހިންގުމަށް ހުއްދަ ދީފައިވަނީ ކްރިސްޓަލް ހޯލްޑިގްސް ޕްރައިވެޓް ލިމިޓެޑަށެވެ. އެ ކުންފުނިން އައިލާގެ ނަމުގައި ހިންގާ މި މަޝްރޫއު ކުރިއަށް ގެންދިއުމަށް ހުށަހަޅައިފައި ވަނީ ނ. އަތޮޅުގެ ދިގުފަރު ފަޅާއި، ދެކެނަންފަރު އަދި ކުރަމަދޫގައެވެ.
މި މަޝްރޫޢުގެ ދަށުން ލަގްޒަރީ ރިއަލް އެސްޓޭޓް ތަރައްޤީކުރުމާއި، ދުނިޔޭގެ ފެންވަރުގެ ޞިއްޙީ ޚިދުމަތްދޭ ތަންތަނާއި، މަދުވެގެން 60 އިންސައްތަ އިޢާދަކުރަނިވި ހަކަތައިން ބޭނުންކުރެވޭ އަމިއްލަ އަށް ފުދޭވަރުގެ އިންފްރާސްޓްރަކްޗަރ ތަރައްޤީކުރުން ހިމެނެއެވެ. މީގެ އިތުރުން އެޑްވާންސް އެގްރިކަލްޗަރ އަދި އެކުއާކަލްޗަރ މެދުވެރިކޮށް ކާބޯތަކެތީގެ ރައްކާތެރިކަމަށް ބާރުއަޅައި، ކާބޯތަކެތީގެ ޔަގީންކަން ލިއްބައިދިނުމަށް މި މަޝްރޫޢުގެ ދަށުން މަސައްކަތްކުރާނެއެވެ.
މިއާއެކު މަތީ ފެންވަރުގެ ފަރާތްތައް ޝައުގުވެރިކުރުވުމަށް ބޭނުންވާ ސަޕޯޓް އިންފްރާސްޓްރަކްޗަރ އާއި މުވައްޒަފުންނާއި އެފަރާތްތަކުގެ ޢާއިލާތަކަށް ބޭނުންވާ ބޯހިޔާވަހިކަމާއި ތަޢުލީމާއި ޞިއްޙީ ޚިދުމަތުގެ ޚިދުމަތަށް ވެސް ވަނީ އަލިއަޅުވާލާފައެވެ.
މި ހުއްދައިގެ ދަށުން ކްރިސްޓަލް ހޯލްޑިންގްސްއިން 180 ދުވަހުގެ ތެރޭގައި ފީސިބިލިޓީ އެސެސްމަންޓަކާއި އިންފްރާސްޓްރަކްޗަރ މާސްޓަރ ޕްލޭނާއި އިންޖިނިއަރިން އަދި ތިމާވެށީގެ ތަހުލީލުތަކާއި ތަފްސީލީ ވިޔަފާރީ ޕްލޭން ހުށަހަޅަންޖެހޭނެއެވެ.
