ފަލަސްޠީނުގެ ރައްޔިތުންނަށް އެހީ ފޯރުކޮށްދިނުމަށް ހުރަސްތައް ނާޅައި، މިނިވަންކަމާއެކު އެހީ ފޯރުކޮށްދިނުމަށް ކެނެޑާއިން ގޮވާލައިފިއެވެ.

ކެނެޑާއިން ޣައްޒާއާއި ހުޅަނގުއައްސޭރިއަށް އެހީ ފޯރުކޮށްދިނުމަށް 99 މިލިއަނަށްވުރެ ގިނަ ޑޮލަރު ހަދިޔާކުރަން ވަނީ ނިންމާފައެވެ.

ކެނެޑާގެ ސަރުކާރުން ބުރާސްފަތި ދުވަހު އިއުލާން ކުރި ގޮތުގައި މި ފައިސާ ހަދިޔާކުރަން ނިންމީ އެ ސަރަޙައްދުގައި ހިނގަމުންދާ ހަނގުރާމައާއި އިންސާނީ ޙާލަތު ދަށަށް ދިއުމާ ގުޅިގެންނެވެ.

ކެނެޑާގެ ފޮރިން މިނިސްޓަރ މެލަނީ ޖޯލީ ވިދާޅުވި ގޮތުގައި މި ފައިސާ ބޭނުންކުރާނީ އދ، ވޯލްޑް ބޭންކް، ރެޑް ކްރޮސް އަދި އެހެނިހެން ޖަމްޢިއްޔާތަކުން ޣައްޒާއާއި ހުޅަނގު އައްސޭރިއަށް އެހީ ފޯރުކޮށްދިނުމަށެވެ.

މި ފައިސާގެ ތެރެއިން 20 މިލިއަން ޑޮލަރު ބޭނުންކުރާނީ އަސާސީ ޚިދުމަތްތައް އަލުން ޤާއިމުކުރުމަށާއި، ޚާއްޞަކޮށް ޞިއްޙީ ދާއިރާއަށާއި، ނިކަމެތި ރައްޔިތުންނަށް އެހީތެރިވުމަށެވެ.

އިޒްރާއީލުން ޣައްޒާއަށް ދެމުންދާ ހަމަލާތަކުގެ ސަބަބުން، ޣައްޒާގެ އިންސާނީ ޙާލަތު ވަނީ ނުހަނު ދަށަށް ގޮސްފައެވެ. އދ. އިން ބުނާ ގޮތުގައި މިހާރު ޣައްޒާގައި ދިރިއުޅޭ 2.3 މިލިއަން މީހުންގެ ތެރެއިން 85 އިންސައްތަ މީހުން ވަނީ ގެދޮރު ދޫކޮށް ފުރާނަ ސަލާމަތްކުރުމަށް އެހެން ތަންތަނަށް ބަދަލުވެފައެވެ.