މާލޭގެ މަގުތަކުގެ ކާނުތައް ސާފުކުރުމަށް ކުރާ މަސައްކަތުގެ ތެރެއިން މަޖީދީ މަގު އޮލިމްޕަހުން ފެށިގެން ރަސްފަންނާ ހަމައަށް ކާނުތައް ސާފުކޮށް ނިންމާލައިފައިވާ ކަމުގައި ސިޓީތަކާއި އިދާރީ ދާއިރާތަކާ ބެހޭ ވުޒާރާއިން ބުނެފިއެވެ.

ބޯކޮށް ވާރޭވެހި މާލޭގެ މަގުތައް ފެންބޮޑުވުމުގެ ސަބަބުން ޢާންމުންނަށް ދިމާވާ ދަތިތައް ޙައްލުކުރުމުގެ ގޮތުން ސިޓީތަކާ ބެހޭ ވުޒާރާއިން މާލޭގެ ކާނުތައް ސާފުކުރުމުގެ މަސައްކަތް ފަށާފައިވަނީ މި މަހުގެ 8 ވަނަ ދުވަހުއެވެ. އެ ދުވަހު އެ މަސައްކަތް ފެށީ މަޖީދީ މަގު ލަގްޒަރީ ފިހާރަ ކުރިމަތިންނެވެ.

Ad by Hajj Corporation

އެ މަސައްކަތުގެ ތެރެއިން މަޖީދީ މަގުން މާފަންނުގެ ހުރިހާ ކާނެއް ސާފުކޮށްފައިވާއިރު، ދެން އެ މަސައްކަތުގައި ކުރިއަށް ގެންދާނީ ހެންވޭރުގައި ހުރި ކާނުތައް ސާފުކުރުމުގެ މަސައްކަތެވެ. އެ މަސައްކަތްތައް ރޯދަ މަހުގެ ކޮންމެ ދުވަހެއްގެ ހެނދުނު ނުވައަކުން މެންދުރު ފަހު ދޭއް ޖެހުމާ ހަމައަށް ކުރިއަށްގެންދަން އެ ވުޒާރާއިން ވަނީ ނިންމާފައެވެ.

މުޅި މާލޭގެ މަގުތަކުގެ ކާނުތައް ސާފުކުރުމުގެ މަސައްކަތް ނިންމާލުމަށް ހަ މަސް ދުވަސް ހޭދަވާނެ ކަމަށް އެ ވުޒާރާއިން އަންދާޒާކުރެއެވެ. އަދި މި މަސައްކަތުގެ ސަބަބުން މާލެއަށް ދިމާވާ ފެންބޮޑުވުމުގެ މައްސަލައަށް ކޮންމެވެސް ވަރެއްގެ ހައްލެއް ލިބޭނެ ކަމުގައި ވެސް އެ ވުޒާރާއިން މީގެ ކުރިން ބުނެފައިވެއެވެ.