ރާއްޖޭގެ ކާމިޔާބު ފުޓްބޯޅަ ކޯޗު އިހުސާން އަބްދުލްގަނީ (ސާންތީ) ރޭ ނިޔާވެއްޖެއެވެ.

ސާންތީ ނިޔާވީ ކެންސަރު ބައްޔާ ގުޅިގެން ޓްރީޓޮޕް ހޮސްޕިޓަލުގައި ފަރުވާ ހޯއްދަވަމުން ދަނިކޮށެވެ.

Ad by Hajj Corporation

ސާންތީ ވަނީ ފާއިތުވި ދެ އަހަރު ވަންދެން ކެންސަރު ބައްޔާ ކުރިމަތިލައްވަމުން ގެންދަވާފައެވެ. އޭނާގެ ހާލު ދެރަވުމާ ގުޅިގެން ފާއިތުވި މަހު ޓްރީޓޮޕް ހޮސްޕިޓަލުގައި އެޑްމިޓްކުރިއެވެ.

ސާންތީ އަކީ ރާއްޖޭގެ ފުޓްބޯޅައިގެ ތާާރީޚުގައި ފާހަގަކޮށްލެވޭ އެއް ކޯޗެވެ. އޭނާ ވަނީ 2008 ވަނަ އަހަރު ރާއްޖެއިން އެންމެ ފުރަތަމަ ސާފް ޗެމްޕިއަންޝިޕް ކާމިޔާބުކުރިއިރު ގައުމީ ޓީމުގެ އެސިސްޓަންޓް ކޯޗުގެ މަޤާމު ފުރުއްވާފައެވެ. މީގެ އިތުރުން ސާންތީ ވަނީ ގައުމީ ޓީމުގައި ކުޅުއްވުމުގެ އިތުރުން ކްލަބް ފުޓްބޯޅައިގައި ވެސް އެކި މަޤާމުތަކުގައި މަސައްކަތްކުރައްވާފައެވެ.

ސާންތީގެ މޫނުދެއްކުން އޮންނާނީ މިއަދު ހެނދުނު 9:30 އިން ފެށިގެން އިސްލާމީ މަރުކަޒުގައެވެ. އަދި ކަށުނަމާދު އޮންނާނީ މިއަދު މެންދުރު ނަމާދަށްފަހު ހަމަ އެ މަރުކަޒުގައެވެ. ސާންތީގެ ޖަނާޒާ އޮންނާނީ މާލޭ އާސަހަރާގައެވެ.

ސާންތީ ނިޔާވުމުގެ ހިތާމާގައި ތައުޒިޔާ ފޮނުއްވައި ރައީސް ޑރ. މުހައްމަދު މުޢިއްޒު މީސް މީޑިއާގައި ލިޔުއްވި މެސެއްގައި ވިދާޅުވީ، ކުޅިވަރުގެ ރޮނގުން، ވަކީން ޚާއްޞަކޮށް ފުޓްބޯޅައިގައި ބައިނަލްއަޤްވާމީ އަދި ޤައުމީ ފެންވަރުގައިވެސް ދިވެހިރާއްޖެ ފަޚުރުވެރިވާ ޚިދުމަތްތަކެއް ޤައުމަށް ކޮށްދެއްވާފައިވާ މަޝްހޫރު ފުޓްބޯޅަ ކޯޗު އިޙްސާން ޢަބްދުލްޣަނީ (ސާންތީ) އަވަހާރަވުމަކީ، ދިވެހި ކުޅިވަރުގެ ދާއިރާއަށް ލިބުނު ބޮޑު ހިތާމައެއް އަދި ހުސްކަމެއް ކަމަށެވެ.