ފަތުރުވެރިކަމާއި ތިމާވެށްޓާބެހޭ ވުޒާރާއިން މި އަހަރުގެ ވައިލްޑްލައިފް ދުވަހާ ގުޅުވައިގެން ފޮޓޯ މުބާރާތެއް ކުރިއަށްގެންދިއުމަށް ނިންމައި، ބައިވެރިވުމުގެ ފުރުސަތު ހުޅުވާލައިފިއެވެ.

މި މުބާރާތަކީ ރާއްޖޭގެ މުއްސަނދި ތިމާވެއްޓާއި ޤުދުރަތީ ރީތިކަން ފޮޓޯއިން ދައްކުވައިދިނުމާއި ރާއްޖޭގެ ދިރުންތަކާއި އެ ތަކެތީގެ ވެށްޓާއި މެދު ހޭލުންތެރިކަން އިތުރުކުރުމުގެ މަޤްސަދުގައި ޢާންމުކޮށް ހުޅުވާލާފައިވާ މުބާރާތެކެވެ.

މުބާރާތަށް ފޮޓޯ ހުށަހެޅުމަށް ހުޅުވާލާފައިވަނީ "ވައިލްޑްލައިފް"، "އޭރިއަލް (ޑްރޯން)"، އަދި "ހެބިޓެޓްސް" މި ތިން ދާއިރާއިންނެވެ. ކޮންމެ ދާއިރާއަކުންވެސް ވަކިވަކިން ވަނަ ހޮވުމަށް ހަމަޖެހިފައިވާއިރު، ކޮންމެ ދާއިރާއަކުން ހޮވޭ އެންމެ މޮޅު 10 ފޮޓޯ ޢާންމުކޮށް ދެއްކުމަށްޓަކައި ފޮޓޯ މަޢުރަޒެއް ބޭއްވުމުގެ އިތުރުން 'އީ-ބުކްލެޓެއްގައި' ޝާއިޢުކުރުމަށް ހަމަޖެހިފައިވެއެވެ.

މުބާރާތުގެ އިނާމުތަކުގެ ތެރޭގައި ޑްރޯން އަދި ކެމެރާފަދަ ފޮޓޯނެގުމަށް ބޭނުންކުރާ ތަކެތި ހިމެނެއެވެ. ނަމަވެސް، މުބާރާތަށް ހުށައަޅާ ފޮޓޯއަކީ ދިރޭތަކެއްޗާއި އެ ތަކެތީގެ މާހައުލަށް ގެއްލުމެއް ނުވަތަ އުނދަގުލެއް ވާފަދަ ގޮތަކަށް ނަގާފައިވާ ފޮޓޯއަކަށް ވެގެން ނުވާނެކަމަށް ތިމާވެށްޓާ ބެހޭ ވުޒާރާއިން އަންގަވާފައިވެއެވެ.

ފޮޓޯ ހުށަހެޅުމުގެ ސުންގަޑިއަކީ އަންނަ މަހުގެ 3 ބުރާސްފަތި ދުވަހުގެ މެންދުރު 12:00 އެވެ.

ފޮޓޯތައް ތިމާވެށްޓާ ބެހޭ ވުޒާރާގެ މެއިލްއަށް ފޮނުވަންޖެހޭނެއެވެ. މުބާރާތާ ގުޅޭ އިތުރު މަޢުލޫމާތު ވުޒާރާގެ ވެބްސައިޓުން ލިބެން ހުންނާނެކަމަށްވެސް އަންގަވާފައިވެފައިވެއެވެ.

ދުނިޔޭގެ ވައިލްޑްލައިފް ދުވަސް ކޮންމެ އަހަރަކުވެސް ފާހަގަކުރަނީ މާރޗް މަހުގެ 3 ވަނަ ދުވަހުއެވެ.