ހާއްސަ ރައްކާތެރިކަން ބޭނުންވާ ކުދިންނަށް ހަޖޫޖަހާނަމަ، އެކަމަށް ފިޔަވަޅު އަޅާނެ ކަމަށް ބްރޯޑްކޮމްއިން ބުނެފިއެވެ.

ބްރޯޑްކާސްޓިން ކޮމިޝަނުން މިއަދު ނެރުނު ބަޔާނެއްގައި ބުނެފައިވަނީ، ދިވެހި ޖުމްހޫރިއްޔާގެ ޤާނޫނު އަސާސީގެ 35 ވަނަ މާއްދާއިން ހާއްސަ ރައްކާތެރިކަން ލިބިދޭ ފަރާތްތަކާއި ގުޅޭގޮތުން ކޮންޓެންޓް ގެނެސްދޭނަމަ، ހަމަޖެހިފައިވާ އުސޫލުން ޤަނޫނުން ޖާގަދޭ އެންމެ ހަރުކަށި ފިޔަވަޅު އަޅާނޭކަމަށެވެ.

ބްރޯޑްކާސްޓިންގައި އެންމެ ހަރުކަށި އަދަބެއްގެ ގޮތުގައި އޮންނަނީ ޖޫރިމަނާކޮށް އެތަނެއްގެ ލައިސަންސް ބާތިލްކުރުމެވެ.

ބްރޯޑްކޮމްއިން ބުނީ، ޤާނޫނު އަސާސީގައި ބަޔާންކޮށްފައިވާ ކުޑަކުދިންނާއި ޅަފުރައިގެ ކުދިންނާއި އުމުރުން ދުވަސްވީ މީހުންނާއި ހާއްސަ އެހީއަށް ބޭނުންވާ ހާއްސަ ރައްކާތެރިކަން އަދި ބްރޯޑްކާސްޓް ކުރުމުގެ ޤަނޫނުގު 37 ވަނަ މާއްދާގެ ދަށުން ބަޔާންކޮށްފައިވާ ކޯޑް އޮފް ޕްރެކްޓިސްއާ ގައިޑްލައިންތަކާ ތައާރަޒްވާ ކޮންޓެންޓް ގެނެސްދިންކަމުގެ މައުލޫމާތު އެ ކޮމިޝަަނުގެ ސަމާލުކަމަށް އަައިސްފައިވާކަމަށެވެ. މިފަދަ ކޮންޓެންޓް ތަހުގީގުކޮށް އެކަންކަން ރަނގަޅުކުރުމަށް ކުރަންޖެހޭ އެންމެހާ ކަންކަން ކުރުމުގެ ފުރިހަމަ އިހްތިސާސް ކޮމިޝަނަށް ލިބިގެންވާކަން ފާހަގަކުރަމުން އެ ކޮމިޝަނުން ބުނީ، ހުށަހެޅޭ މިފަދަ ކޮންޓެންޓް ބަލައި ޤާނޫން ޖާގަދޭ އެންމެ ހަރުކަށި ފިޔަވަޅު އަޅާނޭކަމަށެވެ.

މީގެއިތުރުން، ބްރޯޑްކޮމްއިން ވަނީ ޤާނޫނުއަސާސީއާއި ރާއްޖޭގައި ޢަމަލުކުރަމުންދާ އެންމެހައި ޤާނޫނުތަކަށް އިޙްތިރާމްކޮށް، އެއްވެސް ފަރާތެއްގެ އަބުރާއި ކަރާމާތް ނުގެއްލޭ ގޮތަށް ކޮންޓެންޓް އުފެއްދުމަށް ބްރޯޑްކާސްޓަރުންނަށް އިލްތިމާސްކޮށްފައެވެ.

މި އިންޒާރު ދީފައި މި ވަނީ ރާއްޖެ ޓީވީގެ ޕްރޮގްރާމެއްގައި ނުކުޅެދުންތެރިކަން ހުންނަ ކުދިންނަށް ނިސްބަތްކޮށް ފުރައްސާރަކޮށްފައިވާ ދަނޑިވަޅެއްގައެވެ.