2022 ވަނަ އަހަރު ވުޖޫދުކުރި ރީބްރޯޑްކާސްޓްކުރުމުގެ ޤަވާއިދުގެ ދަށުން، ހަމައެކަނި 100 އިންސައްތަ ދިވެހި ކުންފުންޏަކަށް ރީ ބްރޯޑްކާސްޓްކުރެވޭ ގޮތަށް އޮތް އޮތުން ބަދަލުކޮށް، އެ ޤަވާއިދު އިސްލާޙުކޮށްފިއެވެ.

ބްރޮޑްކާސްޓިން ކޮމިޝަނުން މިއަދު ގެޒެޓުކުރި އެ ޤަވާއިދުގެ ތިންވަނަ އިސްލާޙުގައި ބުނާ ގޮތުން، ހަމައެކަނި 100 އިންސައްތަ ދިވެހި ކުންފުންޏަކަށް ރީބްރޮޑްކާސްޓް ކުރެވޭ ގޮތަށް އޮތް އެ ޤަވާއިދުގެ އަށް ވަނަ މާއްދާގެ (ހ)ގެ ފަސް ވަނަ ނަންބަރު މިހާރު ވަނީ އުނިކޮށްފައެވެ.

Ad by Hajj Corporation

މި ބަދަލާއެކު، ރާއްޖެއިން ބޭރުގެ ކުންފުނިތަކަށް ވެސް ރާއްޖޭގައި ރީ ބްރޯޑްކާސްޓްކުރުމުގެ ފުރުސަތު ލިބޭނެއެވެ.

2022 ވަނަ އަހަރުގެ ޖެނުއަރީ މަހު ޢަމަލުކުރަން ފެށި މި ޤަވާއިދުގެ ސަބަބުން އޭރު ރާއްޖޭގައި ރީ ބްރޯޑްކާސްޓްކުރުމުގެ ޚިދުމަތް ދިން ދިރާގުން، އެ ޚިދުމަތް ހުއްޓާލަން ޖެހުނެވެ. އެއީ އޭރު އޮތް ޤަވާއިދުގައި ބުނާ ގޮތަށް، 100 އިންސައްތަ ދިވެހި ކުންފުންޏަކަށް ދިރާގު ނުވާތީއެވެ.

އެހެންކަމުން މިހާތަނަށް ވެސް ރީ ބްރޯޑްކާސްޓްކުރުމުގެ ލައިސަންސް ނަގައިގެން، އެ ޚިދުމަތް ރާއްޖޭގައި ފުޅާ ދާއިރާއެއްގައި ފޯރުކޮށްދެމުން އައީ އަމިއްލަ ކުންފުންޏަކުންނެވެ.