އާޖެންޓީނާ ސައިޒު ކުރާނެކަމަށް މެޗުގެ ކުރިން އިންޒާރުދިނުމަށްފަހު ނިކުތް ރަފީނިޔާ ސައިޒަށް ކަނޑާފައި ގެއަށް ފޮނުވައިފިއެވެ. ދެކުނު އެމެރިކާ (ކޮންމެބޯލް) ވޯލްޑްކަޕް ކޮލިފައިންގައި މިއަދު އާޖެންޓީނާ ވަނީ ހިތިގޮތަކަށް ވާދަވެރި ބްރެޒިލް 1-4 އިން ބަލިކޮށްފައެވެ.

ދެކުނު އެމެރިކާގެ އެންެމެ ބޮޑު ސްޓޭޑިއަމް ކަމަށްވާ ރިވަރ ޕްލޭޓްގެ ސްޓޭޑިއަމްގައި ކުލުނު މިމެޗު ފެށީވެސް ގޯލަކުންނެވެ. އެގޮތުން އެންމެ 4 މިނެޓުތެރޭގައި އެތްލެޓިކޯ މެޑްރިޑްގެ ފޯވާޑް ޖޫލިއަން އަލްވާރޭޒް ވަނީ ބްރެޒިލްގެ ގޯލު ފޫއަޅުވާލާފައެވެ. އަދި މެޗުގެ އެންމެ 12 ވަަނަ މިނެޓުތެރޭގައި އާޖެންޓީނާއިން ވަނީ ދެވަނަ ގޯލުޖަހައި ބްރެޒިލް ސިއްސުވާލާފައެވެ. މިގޯލު ކާމިޔާބުކޮށްފައިވަނީ އެންޒޯ ފެނާންޑޭޒް އެވެ.
މެޗުގެ ބްރެޒިލްގެ ހަމައެކަނި ގޯލު ޖަހާފައިވަނީ ފުރަތަމަ ހާފުގެ 26 ވަނަ މިނެޓުގައި އާޖެންޓީނާގެ ޑިފެންޑަރ ރޮމޭރޯ އަށް ހެދުނު ގޯހަކާއި ގުޅިގެން ލިބުނު ބޯޅައަކުން ވުލްވްސް މެތިއަސް ކުންހާއެވެ.

ނަމަވެސް ފުރަތަމަ ހާފު ނިމުމުގެ ކުރިން އާޖެންޓީނާގެ މެކަލިސްޓަރ ވަނީ އިތުރު ގޯލެއް ޖަހައި ލީޑު ފުޅާކޮށްފައެވެ. އާޖެންޓީނާގެ ފަހުގޯލު ކާމިޔާބުކޮށްދިނީ ދެވަނަ ހާފުގައި 68 ވަނަ މިނެޓުގައި ބަދަލުކުޅުންތެރިއެއްގެ ގޮތުގައި ނިކުން ޖޫލިއާނޯ ސިމިއޯނީ، އޭނާ ދަނޑަށް ނިކުތްތާ 3 މިނެޓު ތެރޭގައެވެ. މިއީ އާރޖެންޓީނާގެ ޖޯޒީގައި އޭނާ ޖެހި ފުރަތަމަ ގޯލެވެ. އަދި މިއީ އާޖެންޓީނާގެ ސީނިއަރ ޓީމަށް ސިމިއޯނީ ކުޅުނު 2 ވަނަ މެޗެވެ. މުޅި މެޗުގައިވެސް ބްރެޒިލްގެ ޑިފެންސް ލައިނުން ފެނިގެންދިޔައީ ވަރަށް ދަށްކުޅުމެކެވެ.
މިމެޗުގައި އަނިޠާގެ ސަބަބުން އާރޖެންޓީނާގެ ކެޕްޓަން މެސީގެ އިތުރުން ބްރެޒިލްގެ ނޭމާ އަށް ނުކުޅެވުނެވެ.

މިމޮޅާއެކު ކޮލިފިކޭޝަން ތާވަކުގެ އެއްވަނައިގައި އާޖެންޓީނާ ވޯލްޑްކަޕަށް ކޮލިފައިވެފައިވާއިރު، ބްރެޒިލް މިވަގުތު އޮތީ ތާވަލުގެ 4 ވަނައިގައެވެ.