އެފްއޭއެމް ވެޓެރަންސް ލީގު 2025 ގެ ސެމީ ފައިނަލްގައި ފަހަތުން އަރައި މުއިވެޔޮ ފްރެންޑްސް ބަލިކޮށް، މުބާރާތުގެ ފައިނަލަށް އެންމެ ފަހުގެ ޗެމްޕިއަން ހުޅުމާލެ ވެޓެރަންސް ކުލަބު ދަތުރުކޮށްފިއެވެ. މާފަންނު ޓާފް ދަނޑުގައި އިއްޔެ ހަވީރު ކުޅުނު މެޗުގައި ހުޅުމާލެ ވެޓެރަންސް ވަނީ 2-1 ގެ ނަތީޖާއަކުން މޮޅުވެފައެވެ.

މިދިޔަ އަހަރުގެ މުބާރާތުގެ ފައިނަލްގައިވެސް ވާދަކުރި ދެ ޓީމުގެ މެދުގައި ކުޅުނު ފޯރިގަދަ މެޗުގައި އެންމެ ފުރަތަމަ ލަނޑުޖެހީ މުއިވެޔޮ ފްރެންޑްސްއިންނެވެ. ދެވަނަ ހާފުގެ ފުރަތަމަ މިނެޓުގައި އެ ޓީމަށް ލަނޑު ކާމިޔާބުކޮށްދިނީ އަބްދުﷲ ސުޖާއު އެވެ.

ނަމަވެސް މެޗުގެ ފަހު ފަސް މިނެޓުގެ ތެރޭގައި ހުޅުމާލެ ވެޓެރަންސްއިން ވަނީ މެޗުގެ ނަތީޖާ އަނބުރާލާފައެވެ. މެޗުގެ 59 ވަނަ މިނެޓުގައި ހުސައިން ޝިމާޒް (ކޮކީ) ވަނީ ލަނޑެއް ޖަހައި ނަތީޖާ އެއްވަރުކޮށްފައެވެ. އަދި މެޗު ނިމެން އެންމެ މިނެޓެއް ބާކީ އޮއްވާ އަބްދުﷲ ޒުބައިރު ޖެހި ލަނޑާއެކު ހުޅުމާލެ ވެޓެރަންސް ވަނީ ފައިނަލުގެ ޖާގައެއް ކަށަވަރުކޮށްފައެވެ.

މި މޮޅާއެކު މުބާރާތުގެ ފައިނަލުގައި ހުޅުމާލެ ވެޓެރަންސް ވާދަކުރާނީ ވިލިމާލެ ޔުނައިޓެޑާ ދެކޮޅަށެވެ. ވިލިމާލެއިން ފައިނަލުގެ ޖާގައެއް ހޯދާފައިވަނީ ސެމީ ފައިނަލްގެ ފުރަތަމަ މެޗުގައި ޕެނަލްޓީ ޖަހައިގެން ޕޮލިސް ކުލަބު ބަލިކުރުމަށްފަހުގައެވެ.ފައިނަލް މެޗު ކުޅޭނީ މާދަމާ ހަވީރު 16:10 ގައި އެފްއޭއެމް ޓަރފް 1 ގައެވެ.