ރާއްޖޭގައި ބަންކަރިންގެ ޚިދުމަތް ފެށުމަށް މިހާރު ތައްޔާރުވެފައިވާއިރު، އެ ޚިދުމަތް ފެށުމުން ރާއްޖެއަށް އިގްތިސާދީ ގޮތުން ބޮޑެތި ފައިދާތަކެއް ލިބިގެންދާނެ ކަމަށް އެސްޓީއޯއިން ބުނެފިއެވެ.

ރާއްޖޭގައި ބަންކަރިންގް ޚިދުމަތް ފެށުމަށް ގެންނަންޖެހޭ ބޯޓުތައް ގެނައުމުގެ މަސައްކަތް މިހާރު ވަނީ ފަށާފައެވެ. އެގޮތުން އެ ޚިދުމަތް ފެށުމަށްޓަކައި ގެންނަ ދެވަނަވެސް ބޯޓު މިވަނީ ކުޅުދުއްފުއްޓަށް ބަނދަރުކޮށްފައެވެ.

ރާއްޖޭގައި ބަންކަރިންގެ ޚިދުމަތް ފެށުމަށް ނިންމާފައިވަނީ މިމަހުގެ 20 ވަނަ ދުވަހުއެވެ.

އެކަމާއި ގުޅިގެން މައުލޫމާތު ދެއްވަމުން އެސްޓީއޯގެ މީޑިއާ އޮފިޝަލް ޔޫސުފް ޝާހު ވިދާޅުވީ، ބަންކަރިންގެ ޚިދުމަތް ފެށުމަށް ގެންނަ ދެވަނަ ބޯޓު ހދ. ކުޅުދުއްފުއްޓަށް މިހާރު ބަނދަރުކޮށްފައިވާ ކަމަށާއި، މިކަމުގެ ސަބަބުން ރާއްޖޭގެ އިގްތިސާދަށް ކުރާ ފައިދާއެއްގެ ގޮތުން ރާއްޖެއަށް ވަންނަ ބޭރުފައިސާގެ އަދަދު އިތުރުވެގެންދާނެ ކަމަށެވެ.

ބަންކަރިންގެ ޚިދުމަތަކީ ރާއްޖޭގައި މުޅިން އަލަށް ފަށަން ނިންމާފައިވާ ޚިދުމަތެކެވެ. ސަރުކާރުން މިހާރު ދަނީ މި ޚިދުމަތް ފެށުމަށް ވާނެޖެހޭ އެންމެ ފަހުގެ ތައްޔާރީތައް ވަމުންނެވެ.

ބަންކަރިންގެ ޚިދުމަތް ފެށުމަށް ވަމުން އަންނަ ތައްޔާރީތަކާ ގުޅޭ ގޮތުން ހީނާ ވިދާޅުވީ، މި ސަރުކާރުގެ ފުރަތަމަ އަހަރުގެ ތެރޭގައި ރާއްޖޭގައި އަލަށް ބަންކަރިން ޚިދުމަތް ފެށުމަށް ގެންނަންޖެހޭ ބޯޓުތައް ގެނައުންފަދަ ތައްޔާރީތައް އެސްޓީއޯ، އެމްޕީއެލް އަދި އިކޮނޮމިކް ޑިވެލޮޕްމަންޓް އެންޑް ޓްރޭޑާއި ކަމާ ގުޅުންހުރި ފަރާތްތަކާއި ގުޅިގެން މިހާރު ކުރަމުން އަންނަ ކަމަށެވެ.

ބަންކަރިންގެ ހިދުމަތާ އެކު އިންޓަނޭޝަނަލް ކަސްޓަމަރުންނަށް، އިތުރު 14 ހިދުމަތްތަކެއް މި ސަރަޙައްދުން ފޯރުކޮށްދޭނެ ކަމަށް އެމްޕީއެލް އިން ބުނެއެވެ. މިކަމުގެ ސަބަބުން ސަރުކާރުގެ އެހެން ކުންފުނި ތަކަށާއި، އަމިއްލަ ކުންފުނި ތަކަށް އަދި އަމިއްލަ މީހުންނަށް ވެސް އާމްދަނީ ހޯދުމުގެ އިތުރު ފުރުސަތުތައްވެސް ފަހުވެގެންދާނެއެވެ.

ސަރުކާރުން ބުނި ގޮތުގައި، އިހަވަންދިއްޕޮޅު ކައިރިން ދުވާލަކު 300 އަށްވުރެ ގިން އާގުބޯޓު ދަތުރުކުރެއެވެ. އެހެން ކަމުން މި ޚިދުމަތާއެކު ރާއްޖޭގެ އިގުތިސާދަށް މިލިއަނެއްހާ ޑޮލަރު ވަންނާނެ ކަމުގައި ސަރުކާރުން ދެކެއެވެ.