ސްޕެއިންގެ ލަލީގާގައި ރޭގައި އޮސަސޫނާއާ 3-0 ން ބަލިކޮށް ބާސެލޯނާއިން ތާވަލުގެ އެއްވަނައިގައި ތިން ޕޮއިންޓުގެ ލީޑެއް ހޯދައިފިއެވެ.

މޮންޖުއިކް ސްޓޭޑިއަމްގައި 42،000 އަށްވުރެ ގިނަ ސަޕޯޓަރުންނާއެކު ކުޅުނު މި މެޗުގައި ބާސާގެ ފުރަތަމަ ލަނޑު 11 ވަނަ މިނެޓުގައި ޖަހާފައިވަނީ ފެރާން ޓޮރެސް އެވެ. އަދި އޭގެ 10 މިނެޓު ފަހުން އޮސަސޫނާގެ ގޯލްކީޕަރުގެ ފައުލަކާ ގުޅިގެން ލިބުނު ޕެނަލްޓީއެއް ޑެނީ އޮލްމޯ ވަނީ ގޯލަކަށް ބަދަލުކޮށްފައެވެ.

މި މެޗަކީ މި މަހުގެ 8 ވަނަ ދުވަހު ކުޅެން އޮތް މެޗެކެވެ. ނަމަވެސް ބާސެލޯނާގެ ޓީމު ޑޮކްޓަރު ކާލްސް މިނޭރޯ ގާސިއާ ކުއްލިއަކަށް މަރުވުމާގުޅިގެން މެޗު ވަނީ އިއްޔެއަށް ފަސްކޮށްފައެވެ. މެޗު ކެންސަލްކުރި އިރު ދަނޑަށް މީހުން ވަދެ، ދެ ޓީމުގެ ކުޅުންތެރިން ވޯމްއަޕްވެސް ވަނީ ކޮށްފައެވެ.

މެޗުގެ ތިންވަނަ ލަނޑު 77 ވަނަ މިނެޓުގައި ޖެހީ ރޮބަޓް ލެވަންޑޯސްކީއެވެ މިއީ އޭނާ މި ސީޒަނުގައި ލަލީގާގައި ޖެހި 23 ވަނަ ލަނޑެވެ. ލެވަންޑޮވްސްކީ މިވަގުތު އޮތީ ލަލީގާގެ ގޯލު ޗާޓުގެ އެއްވަނައިގައެވެ.

ރޭގެ މޮޅާއެކު ބާސެލޯނާ ވަނީ މިހާތަނަށް ކުޅުނު 28 މެޗުން 63 ޕޮއިންޓް ހޯދައި، ތާވަލުގެ އެއްވަނައިގައި ހަމަޖެހިލާފައެެވެ. ދެވަނައިގައިވާ ރެއަލް މެޑްރިޑަށް 60 ޕޮއިންޓް ލިބިފައިވާއިރު، އެޓްލެޓިކޯ މެޑްރިޑް 56 ޕޮއިންޓާއެކު ވަނީ ތިންވަނައިގައެވެ.

އިންޓަރނޭޝަނަލް ބްރޭކަށްފަހު ކުޅުންތެރިންނަށް އެކަށީގެންވާ އަރާމު ނުލިބި މެޗު ކުޅެން ޖެހުނު ކަމަށް ބާސެލޯނާގެ ކޯޗު ހެންސީ ފްލިކް ވަނީ ފާޑުކިޔާފައެވެ. މި ސަބަބާހުރެ މި ސީޒަނުގައި 27 ލަނޑު ޖަހާފައިވާ ބްރެޒިލްގެ ރަފީނިއާއަށް މި މެޗުގައި ނުކުޅެވުނެވެ.