ނިއުކާސްލް ޔުނައިޓެޑްގެ ސްޓްރައިކަރު އަލެކްސަންޑަރ އިސާކް ސޮއިހޯދުމަށް އިނގިރޭސި ޕްރިމިއަރ ލީގުގެ ބޮޑެތި ދެ ކުލަބު ކަމަށްވާ އާސެނަލް އަދި ލިވަޕޫލުން މި އަހަރުގެ ސަމަރ ޓްރާންސްފަރ ވިންޑޯގައި ވާދަވެރި މަސައްކަތްތަކެއް ކުރާނެ ކަމަށް ފެބްރިޒިއޯ ރޮމާނޯ ހާމަކޮށްފިއެވެ.

ޓްރާންސްފަރ މާކެޓްގެ މަޝްހޫރު ނޫސްވެރިޔާ ރޮމާނޯ ބުނި ގޮތުގައި މި ދެ ކުލަބުން އިސާކް ސޮއިކުރުމަށް "މުހިންމު ހުށަހެޅުންތަކެއް" ހުށަހަޅާނެއެވެ. "އަޅުގަނޑު އުންމީދުކުރަނީ އާސެނަލް އަދި ލިވަޕޫލުން މުހިންމު ހުށަހެޅުންތަކަކާއެކު ކުރިއަށް އައުން،" ރޮމާނޯ ބުންޏެވެ.

އެހެންނަމަވެސް ނިއުކާސްލްއިން އިސާކް ހިފަހައްޓަން މަސައްކަތް ކުރާނެ ކަމަށް ރޮމާނޯ ފާހަގަކުރިއެވެ. ކުލަބުން މަސައްކަތް ކުރަނީ އޭނާގެ ކޮންޓްރެކްޓް އިތުރުކޮށް، ކުރިއަށް އޮތް އަހަރުތަކުގައިވެސް ކުލަބުގެ މުހިންމު ކުޅުންތެރިއެއްގެ ގޮތުގައި ބޭތިއްބުމަށެވެ.

ސްވީޑިޝް ސްޓްރައިކަރު އިސާކްއަކީ މި ސީޒަނުގައި ޕްރިމިއަރ ލީގުގައި އެންމެ ފާހަގަކޮށްލެވޭ ކުޅުންތެރިންގެ ތެރެއިން އެކެކެވެ. އޭނާގެ ވަރުގަދަ ފޯމާއި ގޯލު ޖަހާ މިންވަރު އިތުރުވުމާއެކު، ބޮޑެތި ކުލަބުތަކުގެ ސަމާލުކަން ވަނީ އިތުރުވެފައެވެ.

ރޮމާނޯ ބުނާ ގޮތުގައި މި ކުޅުންތެރިޔާއަށް ޓަކައި ކުރިއަށް އޮތް ސަމަރ ޓްރާންސްފަރ ވިންޑޯގައި "ބޮޑު ހަނގުރާމައެއް" ކުރިމަތިވާނެއެވެ. އެހެން ނަމަވެސް އެންމެ ފަހުގެ ނިންމުން ބިނާވާނީ އިސާކްގެ ނިންމުމާއި ނިއުކާސްލްއާއެކު ކުރެވޭ މަޝްވަރާތަކުގެ މައްޗަށެވެ.ސައުދީގެ ޕަބްލިކް އިންވެސްޓްމަންޓް ފަންޑުން 2021 ވަނަ އަހަރުގައި ނިއުކާސަލް ގަތްފަހުން އެޓީމަށް ބޮޑެތި އިންވެސްޓްމަންޓަކެއް އަންނަނީ ކުރަމުންނެވެ. އަދި ޕްރީމިއަރ ލީގުގެ އެންމެ މަތީގައި ފައިހަމަކުރުމަށް އެޓީމުން މަސައްކަތްކުރާ ދަނޑިވަޅުގައި އިސާކްފަދަ ކުޅުންތެރިއެއް ދޫކޮށްލުމަކީ ނާދިރުކަމެކެވެ. ސަޢޫދީން ކުލަބު ގަތްފަހުން ނިއުކާސަލް އިން ވަނީ އެޓީމުން ވޭތުވެ ދިޔަ 70 އަހަރުތެރޭގައި ފުރަތަމަ ފަހަރަށް ޑޮމެސްޓިކް ތައްޓެއް ހޯދާފައެވެ.