ޗެލްސީ އެފްސީ ހޯލްޑިންގްސް ލިމިޓެޑުން 2023/24 ވަނަ ސީޒަންގެ މާލީ ހިސާބުތަކުން ހާމަކޮށްފިއެވެ. މިގޮތުން ޓެކްސް އުނިކުރުމުގެ ކުރިން 128.4 މިލިއަން ޕައުންޑްގެ ފައިދާ ވަނީ ލިބިފައެވެ. މިއީ ކުރީ އަހަރު 90.1 މިލިއަން ޕައުންޑްގެ ގެއްލުން ވުމަށްފަހު ލިބުނު ބޮޑު ކުރިއެރުމެކެވެ.

ކުޅުންތެރިން ވިއްކައިގެން ލިބުނު ފައިދާއާއި ޗެލްސީ ފުޓްބޯޅަ ކުލަބުގެ އަންހެނުންގެ ޓީމުގެ ހިންގުން އަލުން އެކުލަވާލުމުގެ ސަބަބުން މި ފައިދާ ވަނީ ލިބިފައެވެ. ނަމަވެސް ޗެމްޕިއަންސް ލީގުގައި ބައިވެރިނުވެވުމުގެ ސަބަބުން ޖުމުލަ އާމްދަނީ 468.5 މިލިއަން ޕައުންޑަށް ދަށްވެފައިވެއެވެ.

ސްޓޭމްފޯޑް ބްރިޖްގައި އެވްރެޖްކޮށް 40،000 ސަޕޯޓަރުން މެޗުބެލުމާެކު މެޗްދުވަހުގެ އާމްދަނީ 80.1 މިލިއަން ޕައުންޑަށް އިތުރުވެފައިވެއެވެ. އަދި ސްޓޭޑިއަމް ޓުއާތަކާއި މާޗެންޑައިޒް ވިއްކައިގެން ލިބުނު އާމްދަނީގެ ސަބަބުން ވިޔަފާރީގެ އާމްދަނީ 225.3 މިލިއަން ޕައުންޑަށް އަރާފައިވެއެވެ.

ކުޅުންތެރިން ވިއްކައިގެން 152.5 މިލިއަން ޕައުންޑް އަދި ސަބްސިޑިއަރީތައް ވިއްކައިގެން 198.7 މިލިއަން ޕައުންޑްގެ ފައިދާ ލިބުމާއެކު، ޓެކްސް އުނިކުރުމަށްފަހު ކުލަބަށް 129.6 މިލިއަން ޕައުންޑްގެ ސާފު ފައިދާ ވަނީ ލިބިފައެވެ.

އަންހެނުންގެ ޓީމުވެސް ވަނީ ކުލަބުގެ މާލީ ކުރިއެރުމުގައި މުހިންމު ދައުރެއް އަދާކޮށްފައެވެ. އެގޮތުން ވިދިވިދިގެން ދެވަނަ ފަހަރަށް ޔޫއެފާ ވިމެންސް ޗެމްޕިއަންސް ލީގުގެ ސެމީފައިނަލަށް ގޮސް، އަދި ވިމެންސް ސުޕަރ ލީގުގެ ޗެމްޕިއަންކަން ހޯދުމުން ބްރޯޑްކާސްޓިންގ އާމްދަނީ އިތުރުވެފައިވެއެވެ.