ރައްޔިތުންގެ މަޖިލީހުގެ މެންބަރުންގެ މުސާރަ ކުޑަކުރުމަށް ގޮވާލައި، ޕެޓިޝަނެއްގައި ސޮއިކުރަން ފަށައިފިއެވެ.

މި ޕެޓިޝަނަކީ ޗޭންޖު.އޯގް ވެބްސައިޓް މެދުވެރިކޮށް އޮންލައިންކޮށް ސޮއިކުރެވޭ ގޮތަށް ހުޅުވާލާފައިވާ ޕެޓިޝަނެކެވެ.

ޕެޓިޝަނުގައި ބަޔާންކޮށްފައިވާ ގޮތުގައި، ރާއްޖޭގެ އިގްތިޞާދަށް މާލީ ގޮތުން ބޮޑު ބުރައެއް ކުރިމަތިވެފައިވާ މި ދަނޑިވަޅުގައި މަޖިލިސް މެންބަރުންނަށް ދެމުންދާ ބޮޑެތި މުސާރަތަކާއި، ކޮމިޓީ އެލަވަންސްތަކާއި، ޕްރީމިއަމް ހެލްތު އިންޝުއަރެންސްއަކީ ވަރަށް ބޮޑަށް ކަންބޮޑުވާންޖެހޭ ކަމެކެވެ.

މީގެ އިތުރުން، ރާއްޖޭގެ ދަރަނި އަދި ބަޖެޓު ޑެފިސިޓް އިތުރުވަމުން ދިއުން ފަދަ އިގްތިޞާދީ ބޮޑެތި ގޮންޖެހުންތަކާ ކުރިމަތިލާން ޖެހިފައިވާތީ، ސަރުކާރުގެ ބޭކާރު ޚަރަދުތައް ކުޑަކުރުމަށް ފިޔަވަޅުތަކެއް އެޅުމަކީ ކޮންމެހެން ކުރަންޖެހޭ ކަމެއް ކަމަށް ޕެޓިޝަނުގައި ބުނެފަވެއެވެ.

ޕެޓިޝަނުގައި އިތުރަށް ބަޔާންކޮށްފައިވާ ގޮތުގައި، މަޖިލިސް މެންބަރުންނަށް ލިބޭ މުސާރައިގެ އިތުރުން އެކި އިނާޔަތްތަކާއި ޗުއްޓީތަކާ އަޅާބަލާއިރު، އެ މެންބަރުން އެކަށީގެންވާ ވަރަށް މަސައްކަތް ނުކުރާ ކަމަށް ވަނީ ބުނެފައެވެ. އަދި ރާއްޖޭގެ އިގްތިޞާދު ދަށްވަމުން އަންނަ މި ދަނޑިވަޅުގައި، އާންމު ރައްޔިތުންނަށް ލިބޭ މުސާރައާ އަޅާބަލާއިރު މަޖިލިސް މެންބަރުންނަށް މިހާ ބޮޑު އާމްދަނީއެއް ދިނުމަކީ ބޭއިންސާފެއް ކަމަށްވެސް ޕެޓިޝަނުގައި ބުނެފައިވެއެވެ.