ހެމްސްޓްރިންގް އަނިޔާއާއި ހެދި ޑިސެމްބަރު މަހުން ފެށިގެން ކުޅުމުން ދުރުގައި ހުރި ބުކާޔޯ ސަކާ އެނބުރި އައިސް ކުޅުމަށް ނުކުމެ ގޯލެއް ޖަހައި، އާސެނަލް އިން ފުލްހަމް 2-1 އިން ބަލިކޮށްފިއެވެ.

އެމިރޭޓްސް ސްޓޭޑިއަމްގައި ކުޅުނު މި މެޗުގައި އާސެނަލްގެ ފުރަތަމަ ގޯލު ޖެހީ މިކެލް މެރިނޯއެވެ. އޭނާ މި ގޯލު ޖެހީ މެޗުގެ 37 ވަނަ މިނެޓްގައެވެ. އެއަށްފަހު ސަކާ ކުޅުމަށް ނުކުތުމަށްފަހު 7 މިނެޓް ތެރޭގައި ގެބްރިއެލް މާޓިނެލީގެ ކްރޮސްއަކުން ހެޑަރަކުން ގޯލެއް ޖަހައި އާސެނަލްގެ ލީޑު ވަނީ 2-0 އަށް ފުޅާކޮށްފައެވެ.

މެޗުގެ އިންޖަރީ ޓައިމްގައި ރޮޑްރިގޯ މުނިޒް ޖެހި ގޯލާއެކު ފުލްހަމް މެޗަށް އެނބުރި އައި ނަމަވެސް، އެއީ މާ ލަހުން ކުރެވުނު މަސައްކަތަކަށް ވެގެން ދިޔައެވެ.

މި މުހިންމު ކާމިޔާބީއާއެކު ޕްރިމިއަރ ލީގުގެ ޕޮއިންޓް ޓޭބަލްގެ ދެވަނައިގައި އޮތް އާސެނަލް އަދި ލިވަޕޫލްއާ ދެމެދުގައި އޮތް ޕޮއިންޓުގެ ފަރަގު ވަނީ 9 އަށް ކުޑަވެފައެވެ. އަށްވަނައިގައި އޮތް ފުލްހަމްއަށް އަދިވެސް ޔޫރަޕިއަން ފުޓްބޯޅައިގެ ފުރުސަތު އެބައޮތެވެ.

ރޭގެ މެޗުން އާރސެނަލް މޮޅުވިނަމަވެސް އެޓީމުގެ އެންމެ މުހިންމު ކުޅުންތެރިޔާ ގެބްރިއެލް އަށް މެޗުގެ ކުރީކޮޅުގައި ލިބުނު އަނިޔާއަކާއި ގުޅިގެން އޭނާ ވަނީ ދަނޑުން ބާލާފައެވެ. އާރސެނަލް އަކީ މިސީޒަނުގައި ލީގުގައި އެންމެ މަދުން ގޯލުވަދެފައިވާ ޓީމެވެ. އެގޮތުން ގެބްރިއެލް އަކީ ސަލީބާ އާއެކު އާރސެނަލްގެ ފަހަތް ބެލެހެއްޓުމުގެ އެންމެ މުހިންމު ތަނބެވެ.

ގެބްރިއެލް އަށް އަނިޔާވެފައިމިވަނީ ޗެންޕިއަނަސް ލީގުގެ ކުއާޓަރ ފައިނަލުގައި އާރސެނަލް ރެއާލް މެޑްރިޑް އާއި ކުރިމަތިލާންޖެހިފައިވާ ދަނޑިވަޅެއްގައެވެ. ގިނަބަޔަކު ޤަބޫލުކުރާ ގޮތުގައި ރެއާލް މެޑްރިޑް އާއި ދެކޮޅަށް އާރސެނަލް އިން ބޭނުންކުރާނެ އެންމެ ވަރުގަދަ ހަތިޔާރަކީ އެޓީމުގެ ޑިފެންސްއެވެ. އެހެންކަމުން ގެބްރިއެލްގެ އަނިޔާއާއެކު އާރސެނަލް ސަޕޯޓަރުން ނާއި ކުޅުންތެރިން ތިބީ ނުތަނަވަސްކަމުގެ ތެރޭގައެވެ.ގެބްރިއެލްގެ އަނިޔާގެ މުއްދަތު ދެނަގަނެވޭނީ މިއަދު އެޓީމުން ޓެސްޓްތައް ހެދުމަށްފަހުގައެވެ. މީގެއިތުރުން އެޓީމުގެ ޑިފެންޑަރ ބެން ވައިޓް ވެސް ވަނީ ޓްރެއިނިންގް ތެރޭގައި ލިބުނު އަނިޔާއާހެދި ކުޅުމާއި ދުރުގައެވެ.