ކުޅުދުއްފުށީ ފުލުހުންގެ ބެލުމުގެ ދަށުގައި ހުރި މީހަކު އަމިއްލައަށް މަރުވާން މަސައްކަތްކުރި މައްސަލައެއް ފެންމަތިވެއްޖެއެވެ.

ކުޅުދުއްފުށީ ސިޓީ ކަސްޓޯޑިއަލްގައި ހައްޔަރުގައި ހުރި މީހާ އަމިއްލައަށް މަރުވާން މަސައްކަތްކޮށްފައިވަނީ ރޭ 21:12 އެހާއިރު ކަމަށް ފުލުހުން ބުނެއެވެ. ފުލުހުން މަޢުލޫމާތު ދޭގޮތުގައި އެމީހާއަށް ކުޅުދުއްފުށީ ރީޖަނަލް ހޮސްޕިޓަލްގައި ވަނީ ފަރުވާދީފައެވެ.

ފުލުހުންގެ ބަންދުގައި ހުރި މީހާ ހައްޔަރު ކޮށްފައިވަނީ، އެމީހާ މަސްތުގެހާލަތުގައި ހުރެގެން ގޭގެ މުދަލަށް ގެއްލުންދީ، ހަމަނުޖެހުން ހިންގުމާ ގުޅިގެން ކަމަށް ފުލުހުން ބުނެއެވެ. 34 އަހަރުގެ އެމީހާ ހައްޔަރު ކޮށްފައިވަނި މި މަހުގެ ދެ ވަނަ ދުވަހުއެވެ.

ފުލުހުން ބުނި ގޮތުގައި މި ހާދިސާ އާއި ގުޅިގެން އަޅަންޖެހޭ ފިޔަވަޅުތައް އެޅުމާއެކު، ހިއުމަން ރައިޓްސް ކޮމިޝަން އޮފް ދަ މޯލްޑިވްސް (އެޗްއާރްސީއެމް) އަދި ނޭޝަނަލް އިންޓެގްރިޓީ ކޮމިޝަން (އެންއައިސީ) އަށް މި ހާދިސާގެ މައުލޫމާތު ވާނީ ހިއްސާކޮށްފައެވެ. އަދި މި ހާދިސާގެ ތަހުގީގަށް މޭޖާ ކްރައިމް އިންވެސްޓިގޭޝަންގެ ޓީމެއް ކުޅުދުއްފުށި ސިޓީއަށް ފޮނުވަން ނިންމާފައިވާ ކަމަށެވެ.

މިއާއެކު، މި ހާދިސާ ހިނގާފައިވާ ގޮތުގެ އެތެރޭގެ ތަހުގީގެއް ޕްރޮފެޝަނަލް ސްޓޭންޑާޑްސް ކޮމާންޑުން ހާއްސަ އިސްކަމެއް ދީގެން ބަލަމުންދާ ކަމުގައި ވެސް ފުލުހުން ބުންޏެވެ.