އއ. ރަސްދޫގައި މިދިޔަ މަހުގެ 24 ވަނަ ދުވަހު ހިނގި އަލިފާނުގެ ހާދިސާގައި ފިހުނު ދެމަފިރިންގެ ތެރެއިން ފިރިހެން މީހާ އިތުރު ފަރުވާއަށް އިންޑިއާއަށް ގެންގޮސްފިއެވެ.

އިންދިރާ ގާންދީ މެމޯރިއަލް ހޮސްޕިޓަލް (އައިޖީއެމްއެޗް) އިން މަޢުލޫމާތު ދެއްވާފައިވާ ގޮތުގައި، މި ފިރިހެން މީހާ މިދިޔަ އާދިއްތަ ދުވަހު ވެންޓިލޭޓަރުން ނަގައި އިންޓެންސިވް ކެއަރ ޔުނިޓް (އައިސީޔޫ) ގައި ބޭއްވުމަށްފަހު އިއްޔެ އެ ހޮސްޕިޓަލުން ޑިސްޗާޖް ކޮށްފައިވެއެވެ. އޭނާ ޑިސްޗާޖް ކުރެވުނީ އާއިލާއިން އެދިގެން އިތުރު ފަރުވާއަށް ރާއްޖެއިން ބޭރަށް ގެންދިއުމަށްޓަކައެވެ.

މިދިޔަ މަހުގެ 26 ވަނަ ދުވަހުގެ ރޭ ދަންވަރު ހިނގި މި ހާދިސާގައި އަލިފާން ރޯވެފައިވަނީ، ކުރިން ކައިވެނި ކޮށްގެން އުޅުނު ދެ މީހުންގެ ގައިގައެވެ. މި ހާދިސާގައި އެންމެ ބޮޑަށް ފިހުނު 31 އަހަރުގެ އަންހެން މީހާއަށް އައިޖީއެމްއެޗުގައި ފަރުވާ ދެމުން ދަނިކޮށް މިދިޔަ ހަފުތާގެ ހޯމަ ދުވަހުގެ ރޭ ވަނީ މަރުވެފައެވެ. އަދި ފިރިހެން މީހާގެ ވެސް ގައިގެ ބޮޑުބައެއް ވަނީ މި ހާދިސާގައި ފިހިފައެވެ.

މި ދެ މީހުންނަށް ފަރުވާ ދިނުމުގައި ލަފާ ދިނުމަށް މިދިޔަ މަހުގެ ފަހުކޮޅު އިންޑިއާގެ މުމްބާއީގެ ބަޓިއާ ހޮސްޕިޓަލުގެ ބާންސް އެންޑް ޕްލާސްޓިކް ސާޖަން ޑރ. ޝައިލާޝް ވީ ރަނާދު ވެސް ރާއްޖެ ވަޑައިގެންނެވިއެވެ.

އަލިފާނުގެ ހާދިސާ ހިނގަން މެދުވެރިވި ސަބަބު އަދި އެއްވެސް ފަރާތަކުން ހާމަކޮށްފައެއް ނުވެއެވެ.މިހާދިސާ ތަހުގީގްކުރަމުން އަންނަކަމަށް ފުލުހުންވަނީ ވިދާޅުވެފައެވެ.