ދެފަހަރެއްގެ މަތިން އަލިފާނުގެ ހާދިސާ ހިނގި ހ. ދޫހިމެރިގެ ތަޅާލުމަށްޓަކައި ބަންދުކުރި ދޫހިމެރިމަގު މަސައްކަތް ނިންމުމަށް ފަހު ހުޅުވާލައިފިއެވެ.

ދޫހިމެރިގޭގައި ދެފަހަރެއްގެ މަތިން އަލިފާނުގެ ހާދިސާއެއް ހިނގީ މިމަހުގެ 9ވަނަ ދުވަހުއެވެ. އެ ހާދިސާއަށްފަހު އެ ގެ ތަޅާލުމުގެ މަސައްކަތް ކުރިޔަށް ގެންދިޔައީ ސިޓިތަކާއި އިދާރީ ދާއިރާތައް ހިންގުމާއި އާންމު މަސައްކަތްތަކާ ބެހޭ ވުޒާރާއިންނެވެ.

ސޯސަންމަގު ގާމަގު ކެފޭ ކަންމަތީ ހުންނަ ދޫހިމެރިގޭގައި އަލިފާން ރޯވެ އެތަން ވަނީ ބޭނުން ނުކުރެވޭ ވަރަށް އަނދާފައެވެ. އެތަނަކީ ގިނަ އަދަދެއްގެ ބިދޭސީން ދިރިއުޅެމުން ދިޔަ ތަނެކެވެ.

އެ ހާދިސާގައި ދުމުގެ އަސަރުކޮށްގެން އަންހެނަކު ހޮސްޕިޓަލަށް ގެންގޮސްފައިވެއެވެ. ނަމަވެސް އެމީހާއަށް ލިބުނު ގެއްލުމުގެ ތަފްސީލެއް އަދި އެއްވެސް އިދާރާއަކުން ހާމަކޮށްފައެއްނުވެއެވެ. އެ ހާދިސާގެ ސަބަބުން 57 މީހަކު ޙާލުގައި ޖެހިފައިވާ ކަމަށް ނޭޝަނަލް ޑިޒާސްޓާ މެނޭޖްމެންޓް އޮތޯރޮޓީ (އެންޑީއެމްއޭ) އިން ވަނީ ބުނެފައެވެ.

އޭގެ ތެރޭގައި 37 ދިވެހިންނާއި، 20 ބިދޭސީއަކު ހިމެނެއެވެ. އެ މީހުންނަށް ރައްކާތެރިކަމާ އެކު ދާއިމީ ބޯހިޔާވަހިކަން ހޯދައިދިނުމުގެ މަސައްކަތް ކަމާ ގުޅޭ އިދާރާތަކާއި ގުޅިގެން ކުރަމުންދާ ކަމަށެވެ.