ހަމާސްގެ ކޮމާންޑަރަކު ޝަހީދުކޮށްލާފައިވާކަމަށް އިސްރާއީލުން ބުނެފިއެވެ. ޔަހޫޫދީން ބުނީ ޣައްޒާގެ ޝުޖާއިއްޔާ ސަރަހައްދަށް ދިން ހަމަލާއެއްގައި ހަމާސްގެ ކޮމާންޑަރެއް ކަމަށްވާ މުހައްމަދު އަލް-އަޖްލާ ޝަހީދުކކޮށްލާފައިވާކަމަށެވެ.އަލް-އަޖްލާ އަކީ ފާއިތުވި ހަފްތާގައި ޝަހީދުކޮށްލި ހައިތަމް ރިޒްޤު އަބްދުލް ކަރީމް ޝެއިޚް ޚަލީލްގެ ފަހުން ހަމާސްގެ ޝުޖާއިއްޔާ ލަޝްކަރުގެ ކޮމާންޑަރުގެ މަޤާމާ ހަވާލުވި ފަރާތް ކަމަށް އިސްރާއީލުގެ އިދާރާތަކުން ބުނެފައިވެއެވެ.ހަމަލާއާ ގުޅޭގޮތުން ހަމާސްއިން އަދި އެއްވެސް ބަޔާނެއް ނެރެފައެއް ނުވެއެވެ.

މީގެ އިތުރުން ލުބުނާނުގެ އައިތަރޫން ސަރަޙައްދަށް ދިން ވައިގެ ހަމަލާއެއްގައި ހިޒްބުﷲގެ ކޮމާންޑަރަކު ޝަހީދުކޮށްލާފައިވާކަމަށް ވެސް އިސްރާއިލުން މިއަދުވަނީ ބުނެފައެވެ. އިސްރާއީލާއި ހިޒްބުﷲއާ ދެމެދު 2024 ވަނަ އަހަރުގެ ނޮވެމްބަރު މަހު ވެވުނު ހަނގުރާމަ ހުއްޓާލުމުގެ އެއްބަސްވުމާ ޚިލާފަށް އިސްރާއީލުން ސަތޭކައަށް ވުރެ ގިނަ ހަމަލާ ވަނީ ދީފައެވެ. މިކަމާ ގުޅޭގޮތުން ހިޒްބުﷲ އިން ވެސް އެއްވެސް ބަހެއް ބުނެފައެއް ނުވެއެވެ.

ޣައްޒާގެ މުސްލިމުންނާ ދެކޮޅަށް ޔަހޫދީ ފައުޖުން ލާއިންސާނީ ޖަރީމާތަކެއް ހިންގަން ފަށާފައި ވަނީ 2023ވަނަ އަހަރުގެ އޮކްޓޫބަރު މަހުގެ 7ވަނަ ދުވަހުއެވެ. އެ ޢުދުވާނުގައި ޝަހީދު ކޮށްލާފައިވާ މީހުންގެ އަދަދު 61,700އަށް އުފުލިފައިވާއިރު، އިތުރު 114,000އަށްވުރެ ގިނަ މީހުން ވަނީ ޒަޚަމު ކޮށްލާފައެވެ. އަދި، ޣައްޒާގެ ޢާންމުންގެ ގެދޮރާއި އުމްރާނީ ވަސީލަތްތައް ވަނީ ސުންނާފަތިކޮށް ބިމާ ހަމަކޮށްލާފައެވެ.