ފްރާންސް އަދި ރެއާލް މެޑްރިޑްގެ ސުޕަރ ސްޓާ ކައިލިއަން އެމްބާޕޭ 80 ޕަސެންޓް ހިއްސާ އޮންނަ ކެއެން ކްލަބް، މާޓިގޭސްއާ ދެކޮޅަށް ކުޅުނު މެޗުން 3-0 އިން ބަލިވެ، ފްރާންސްގެ ތިންވަނަ ޑިވިޝަނަށް ވެއްޓިއްޖެއެވެ.

ކްލަބް ރެލިގޭޓްވުމާ ގުޅިގެން ކެއެންގެ ސަޕޯޓަރުން ވަނީ އެމްބާޕޭއާ ދެކޮޅަށް ފާޅުގައި އަޑުއުފުލާފައެވެ. "ކެއެން އަކީ ކަލޭގެ ކުޅޭ ކުޅޭ އެއްޗެން ނޫން" މިހެން ކިޔަމުން ސަޕޯޓަރުން ވަނީ ރުޅިއައިސްފައެވެ. މި ރުޅިވެރިކަން އައީ ކޯޗް ނިކޮލާސް ސޫބް ވަކިކުރުމާ ގުޅިގެން ފާއިތުވި މަހު ފެށުނު ނުތަނަވަސްކަމުގެ ތެރެއިންނެވެ.

އެމްބާޕޭގެ ކެއެންއާ ހުރި ގުޅުމަކީ ދުރު ހިސާބަކުން ފެށުނު ގުޅުމެކެވެ. އޭނާގެ އުމުރުން 15 އަހަރުގައި ކެއެންގެ ޓްރަޔަލްއެއް ފާސްކުރި ނަމަވެސް، ކްލަބަށް ލީގް 1 އަށް ޕްރޮމޯޓްވުމުގައި ނާކާމިޔާބުވުމާއެކު، އޭނާގެ ތަރައްޤީއަށް އިންވެސްޓްކުރުމުގެ ޤާބިލްކަން ނެތުމުން މޮނާކޯގެ ޔޫތް ރޭންކްސްއާ ގުޅުނެވެ. އެހެންނަމަވެސް، ކެއެންއަށް އޮތް ލޯބި ދެމެހެއްޓުމާއެކު، ކްލަބް ގަތުމަށްފަހު އޭގެ ދަރަނިތައް އަދާކޮށް، މުހިންމު ކުޅުންތެރިއެއް ކަމުގައިވާ އަލެކްސާންދްރޭ މެންޑީ ސަންޑަލެންޑަށް ވިއްކުން ހުއްޓުވިއެވެ.

ރެލިގޭޝަނާ ކުރިމަތިލާން ޖެހުނު ނަމަވެސް، އެމްބާޕޭ އަކީ އަދިވެސް ކްލަބުގެ މައި ފިގަރެވެ. އިންޓަރ މިލާންގެ ކުރީގެ ކުޅުންތެރިއެއް ކަމުގައިވާ ޔާން އެމްވިލާ (34) ސައުދީ އަރަބިއާގެ ފުރުސަތުތަކެއް އޮއްވާ ކެއެންއާ ގުޅުނީ އެމްބާޕޭގެ ހިއްސާވުން ކަމުގައި ފާހަގަކޮށްފައިވެއެވެ.

ކެއެންގެ މިހާރުގެ ހާލަތު ދަށުގައި އޮތް ނަމަވެސް، ކްލަބުން ވަނީ އަލުން ބިނާކުރުމަށް ނިންމާފައެވެ. ލީގް 1 އަށް އެނބުރި ދިއުމަކީ މައިގަނޑު ލަނޑުދަނޑިއެވެ.