ސަރުކާރުން ހިންގާ މަޝްރޫއުތައް ސަރުކާރުގެ އަމިއްލަ ކުންފުނިތަކާ ހަވާލުކޮށްގެން ކުރިއަށް ގެންދިޔަސް އެފަދަ މަޝްރޫއުތަކުން އަމިއްލަ ކުންފުނިތައް ބާކީ ނުކުރާނެ ކަމަށް އިކޮނޮމިކް މިނިސްޓަރު މުހައްމަދު ސައީދު މިއަދު ވިދާޅުވެއްޖެ އެވެ.

މިފަހުންވެސް ސަރުކަރުން ވަނީ ބައެއް މަޝްރޫއުތައް ހިންގުމަށް ސަރުކާރު ހިއްސާވާ ކުންފުނިތަކާާ ހަވާލުކޮށްފަ އެވެ. އޭގެ ތެރޭގައި އެމްޓީސީސީ ފެނަކަ ކޯޕަރޭޝަން އާރުދީސީ ހިމެނެ އެވެ. އޭގެ ތެރޭގައި ހޮސްޕިޓަލް އިމާރާތް ކުރުމާއި ސުކޫލް އިމާރާތް ކުރުމާއި ބަނދަރު ހެދުންފަދަ މަޝްރޫއުތައް ހިމެނެ އެވެ.

Ad by Hajj Corporation

މިފަދަ މަޝްރޫއުތައް އަމިއްލަ ކުންފުނިތަކާ ހަވާލުނުކޮށް ަރުކާރު ހިއްސާވާ ކުންފުނިތަކާ ހަވާލު ކުރާތީ އަމިއްލަ ކުންފުނިތަކުން ވަނީ އެކަމުގެ ކަންބޮޑުވުން ފާޅުކޮށްފަ އެވެ.

މިއަދު ބޭއްވި ނޫސްވެރިންގެ ބައްދަލުވުމުގައި އިކޮނޮމިކް މިނިސްޓަރ ސައީދު ވިދާޅުވީ ސަރުކާރުން ހިންގާ ބޮޑެތި މަޝްރޫއުތައް ސަރުކާރު ހިއްސާވާ ކުންފުނިތަކާ ހަވާލުކޮށްގެން ކުރިއަށް ގެންދިޔަ ނަމަވެސް ސަރުކާރުގެ މިފަދަ ބޮޑެތި މަޝްރޫއުތަކުން އަމިއްލަ ކުންފުނިތައް ބާކީ ނުކުރާނެ ކަމަށެވެ.

ވަޒީރު ވިދާޅުވީ ރައީސްގެ ވިސްނުންފުޅަކީ މިފަދަ މަޝްރޫއުތައް އެމަނިކުފާނުގެ ވައުދުފުޅަ އެއްގޮތަށް އަވަހަސް ނިންމާލުން ކަމަށެވެ. އަދި މިފަދަ މަޝްރޫއުތަކުން އަމިއްލަ ކުންފުނިތައް ބާކީ ކުރާ ކަމަށް ބުނެ ފަތުރަމުންގެންދާ ވާހަކަތަކަކީ ހަގގަތާ ހިލާފު ވާހަކަ ތަކެއް ކަމަށް ވަޒީރު ވިދާޅުވި އެވެ.

ވަޒީރު ވިދާޅުވީ މިފަދަ މައްސަލަތަކާ ގުޅިގެން ހުރި ކަންބޮޑުވުންތަކަށް ހައްލު ހޯދުމަށް މޯލްޑިވްސް އެސޯސިއޭޝަން ފޯ ކޮންސްޓްރަކްޝަން އިންޑަސްޓްރީސް (މަސީ) އާއި އެ ނޫން ވެސް ކަމާ ގުޅުންހުރި ޖަމިއްޔާތަކާ އެކު މަޝްވަރާ ކުރަމުން ގެންދާ ކަމަށެވެ. މީގެ އިތުރަށް ކުދި ވިޔަފާރިތަކަށް ދިމާވާ ގޮންޖެހުންތަކާ ގުޅިގެން ހުރި ކަންބޮޑުވުންތައް އެމީހުންގެ ގާތަށް ގޮސް އެކަންކަމަށް ހައްލު ހޯދުމަށް މަސައްކަތް ކުރާ ކަމަށް ވަޒީރު ވިދާޅުވި އެވެ.