އަސާސީ ކާބޯތަކެތީގެ އަގުތައް ދެނެގަތުމަށް "އެސެންޝަލް ކޮމޮޑިޓީ ޕްރައިޒް އިންޑެކްސް"އެއް ތައާރަފް ކުރުމުގެ މަސައްކަތް ކުރިއަށްދާ ކަމަށް އިޤްތިޞާދީ ތަރައްޤީއާއި ވިޔަފާރިއާ ބެހޭ ވަޒީރު މުޙައްމަދު ސަޢީދު ހާމަކުރައްވައިފިއެވެ.

ޕީއެސްއެމްގެ "ރާއްޖެ މިއަދު" ޕްރޮގްރާމްގައި ހޯމަދުވަހުގެ ރޭ ވާހަކަފުޅު ދައްކަވަމުން ވަޒީރު ސަޢީދު ވިދާޅުވީ، ސަރުކާރުން ވޭތުވެދިޔަ ދެ އަހަރެއްހާ ދުވަހުގެ ތެރޭގައި ކާބޯތަކެތީގެ އަގުތައް ކޮންޓްރޯލްކޮށް، އާންމުންނަށް ފަސޭހައިން ތަކެތި ލިބޭނެ ގޮތްތައް ފަހިކުރުމަށް މުހިއްމު ފިޔަވަޅުތަކެއް އަޅާފައިވާ ކަމަށެވެ. މި ފިޔަވަޅުތަކުގެ ސަބަބުން މިދިޔަ ދެ ރަމަޟާން މަހުގައިވެސް އާންމުންނަށް އެކަށީގެންވާ އަގުތަކެއްގައި ކާބޯތަކެތި ލިބިފައިވާ ކަމަށް އޭނާ ފާހަގަކުރެއްވިއެވެ.

Ad by Hajj Corporation

ނެޝަނަލް ބިއުރޯ އޮފް ސްޓެޓިސްޓިކްސްއިން ތައާރަފްކުރާ މި އިންޑެކްސްގައި 162 ބާވަތެއްގެ މުދާ ހިމެނޭނެ ކަމަށް ވަޒީރު ވިދާޅުވިއެވެ. މީގެ ތެރޭގައި ގޭބީސީތަކުން އާންމުކޮށް ކެއިން ބުއިމުގައި ބޭނުންކުރާ 111 އައިޓަމާއި، މޭވާ އަދި ތަރުކާރީގެ 39 ބާވަތާއި، މަހުގެ ބާވަތްތަކުގެ 10 އައިޓަމާއި، ހަކަތައިގެ ބާވަތްތަކުގެ 2 އައިޓަމް ހިމެނެއެވެ.

މި އިންޑެކްސްގައި ހިމެނޭ 35 ބާވަތަކީ އޭގެ ބަދަލުގައި އެހެން އެއްޗެއް ބޭނުންނުކުރެވޭނެ "ކްރިޓިކަލް އައިޓަމް" ތަކުގެ ގޮތުގައި ފާހަގަކޮށްފައިވާ ކަމަށް ވަޒީރު ސަޢީދު ވިދާޅުވިއެވެ.

މި އިންޑެކްސްގެ ޒަރީއާއިން ކޮންމެ މަހެއް ނިމުމުން އަންނަ މަހުގެ އަގުތަކަށް އައިސްފައިވާ ބަދަލުތައް ދެނެގަނެވޭނެއެވެ.

މީގެއިތުރުން، ކާބޯތަކެތީގެ އަގުތައް ދެނެގަތުމަށްޓަކައި ކޮންމެ ދުވަހަކުވެސް ރާއްޖޭގައި ހިންގާ ބޮޑެތި ފިހާރަތަކުގައި ތަކެތި ވިއްކާ އަގުތައް މޮނިޓަރ ކުރަމުންދާ ކަމަށާއި، ވިޔަފާރިތަކަށް ބޭންކުން ޑޮލަރު ދޫކުރާ މިންވަރު އިތުރުކުރުމާއި، ބީއެމްއެލްގައި ރުޕީ އެކައުންޓްތައް ހުޅުވި، ދިވެހި ރުފިޔާ ސެޓްލްމެންޓް ހެދެން ފެށުމުން ތަކެތީގެ އަގުތަކަށް ލުއިތަކެއް އަންނާނެ ކަމަށް ވަޒީރު ސަޢީދު ވިދާޅުވިއެވެ.