ދިވެހި ރާއްޖެ އަށް ތުރުކީން މުދާ އެތެރެކުރުމަށް 75 ބާވަތަކުން ޑިއުޓީ ކަނޑާލާފައިވާ ކަމަށް އިގްތިސޯދީ ވަޒީރު މުހައްމަދު ސައީދު ވިދާޅުވެއްޖެ އެވެ.

ސޯޝަލް މީޑިއާ އަށް ސައީދު ދޫކޮށްލެއްވި ޕޯސްޓެއްގައި ވިދާޅުވީ ރާއްޖޭއާ ތުރުކީއާ ދެމެދުވެފައިވާ މިނިވަން ވިޔަފާރީގެ އެއްބަސްވުމަށް މިއަދު އަމަލު ކުރަން ފެށުމާ އެކު 85 މިލިޔަން މީހުންގެ އާބާދީއަކަށް ރާއްޖޭގެ އުފެއްދުންތައް މިހާރު ބޭރުކުރެވޭނެ ކަމަށެވެ. އަދި މީގެ ސަބަބުން ރާއްޖޭގެ މަހުގެ އުފެއްދުންތައް އެގައުމަށް ބޭރު ކުރަން މަގުފަހިވާނެ ކަމަށް ވެސް ސައީދު ވިދާޅުވި އެވެ.

Ad by Hajj Corporation

ސައީދު ވިދާޅުވީ މި އެއްބަސްވުމަށް އަމަލު ކުރަން ފެށުމަކީ ދެގައުމުގެ އިގްތިސާދާއި ވިޔަފާރީގެ ގުޅުންތަކަށް ލިބުނު އިތުރު ކުރިއެރުމެއް ކަމަށެވެ. މި އެއްބަސްވުމުގެ ސަބަބުން ރާއްޖެއިން ތުރުކީ އަށް މަސް ބޭރުކުރުމަށް އިތުރު ދޮރުތައް ހުޅުވި މަހުގެ ބާވަތްތައް ބޭރުކުރުމުގައި ލުއި ހޯދާދިނުމުގެ އިތުރުން ވިޔަފާރީގެ ހުރަސްތައް ކުޑަކޮށް، ދެގައުމު ދެމެދުގައި ވިޔަފާރީގެ ގުޅުން ވަރުގަދަ ކުރުމާއި، ދިވެހިރާއްޖެއާއި ތުރުކީވިލާތާ ދެމެދު ކުރެވޭ ވިޔަފާރި އިތުރުކުރުމަށް މަގުފަހިވާނެ އެވެ.

މި އެއްބަސްވުމުގެ ސަބަބުން ރާއްޖޭގެ ވިޔަފާރިވެރިންނަށް ތުރުކީން މުދާ އެތެކުރުމަށް ފަސޭހަވެ، ލުއި ގޮތްތަކެއް ލިބޭއިރު، ތުރުކީއާ ދެމެދުކުރާ ވިޔަފާރިތައް އިތުރަށް ފުޅާކުރުމަށް ފަހި ފުރުސަތަކަށް ވެސް ވެގެންދާނެ އެވެ. ރާއްޖެ އިން ވަނީ ޗައިނާއާ ދެމެދު ވެސް މިނިވަން ވިޔަފާރިގެ އެއްބަސްވުމެއް ގާއިމުކޮށްފަ އެވެ. އަދި އިންޑިއާ އާއި ރާއްޖެ އާއި ދެމެދު ވެސް މިނިވަން ވިޔަފާރީގެ އެއްބަސްވުމެއް ގާއިމުކުރުމުގެ އެންމެ ފަހުގެ މަރުހަލާތައް މިހާރު ކުރިޔަށްދާ ކަމަށް ވެސް ސައީދު ކުރިން ވިދާޅުވި އެވެ.