ދުބާއީގައި ބޭއްވި އަރަބި ޓްރެވަލް މާކެޓް (އޭޓީއެމް)2025 ގައި ދިވެހިރާއްޖެއިން ވަނީ ވަރަށް ކާމިޔާބު ބައިވެރިވުމެއް ހޯދާފިއެވެ.

މައުރަޒާ ގުޅޭ ގޮތުން ޓޫރިޒަމް އެންޑް އެންވަޔަރަމަންޓް މިނިސްޓްރީން މަޢުލޫމާތު ދިން ގޮތުގައި، މި މައުރަޒުގައި ދިވެހިރާއްޖެއިން ވަނީ މުހިންމު ބައިވެރިންނާއެކު އުފެއްދުންތެރި މަޝްވަރާތަކެއް ކޮށްފައެވެ. މި މަޝްވަރާތަކުގައި ދެމެހެއްޓެނިވި ފަތުރުވެރިކަމާއި، ގުޅުންތައް ފުޅާކުރުމާއި، ފަތުރުވެރިންގެ ތަޖުރިބާ އިތުރަށް ރަނގަޅުކުރުމަށް އަމާޒުކޮށް މަޝްވަރާކުރެވުނު ކަމަށް ޓޫރިޒަމް މިނިސްޓަރ ޠާރިޤު އިބްރާހިމް ވިދާޅުވިއެވެ.

އޭޓީއެމް 2025 ގައި ދިވެހިރާއްޖެއިން ބައިވެރިވެ، އެހެން ޤައުމުތަކާއި ވިޔަފާރިތަކާއެކު ގުޅުން ބަދަހިކޮށް، އައު ފުރުސަތުތައް ހޯދުމަށް މަސައްކަތްކޮށްފައި ވެސް ވެއެވެ. މީގެ އިތުރުން، ދިވެހިރާއްޖޭގެ ފަތުރުވެރިކަމުގެ ދާއިރާގެ އައު ތަރައްޤީތަކާއި ޕްރޮޖެކްޓްތަކުގެ މަޢުލޫމާތު ބައިވެރިންނާ ހިއްސާކުރެވުނެވެ.

ދިވެހިރާއްޖޭގެ ފަތުރުވެރިކަމުގެ ދާއިރާ އިތުރަށް ކުރިއެރުވުމަށްޓަކައި މިފަދަ މައުރަޒުތަކުގައި ބައިވެރިވުމަކީ ވަރަށް މުހިންމު ކަމެއް ކަމުގައި އެ ވުޒާރާއިން ބުންޏެވެ. އަދި މިފަދަ ފުރުސަތުތައް ބޭނުންކޮށްގެން ދިވެހިރާއްޖޭގެ ފަތުރުވެރިކަން އިތުރަށް ކުރިއަރުވައި، އިޤްތިޞާދީ ކުރިއެރުން ހޯދުމަށް މަސައްކަތްކުރާނެ ކަމުގެ ޔަގީންކަން އެ ވުޒާރާއިން ވަނީ ދީފައެވެ.