ހުސްވެފައިވާ ޕްރޮސެކިއުޓާ ޖެނެރަލްގެ މަގާމަށް އައްބާސް ޝަރީފް އައްޔަން ކުރެއްވުމަށް ރައްޔިތުންގެ މަޖިލީހުގެ ޖުޑީޝަރީ ކޮމިޓީއިން ރުހުން ދީފިއެވެ.

އައްބާސް ޝަރީފު މިވަގުތު އަދާ ކުރައްވަނީ ރައީސްގެ ލީގަލް ސެކެޓްރީގެ މަގާމެވެ، މަގާމަށް ކުރިމަތިލެއްވި ހަ ބޭފުޅުންގެ ތެރެއިން ރައީސުލްޖުމްހޫރިއްޔާ ނަން ފޮނުއްވައިގެން ކޮމިޓީ އިން ފާސްކުރީ އައްބާސް ގެ ނަަން އެކަންޏެވެ. ޖުޑީޝަރީ ކޮމިޓީގެ އިން ކުރި މަގާމާއިބެހޭ އިންޓަވިއު އިން އައްބާސް ވަނީ %93.91 ނަތީޖާ ހޯއްދަވާފައެވެ.

ޕީޖީގެ މަގާމަށް އައްބާސް އައްޔަން ކުރެއްވުމުގެ ގޮތުން ދައުރުން ބޭރުން ޙާއްސަ ޖަލްސާއެއް ރައްޔިތުންގެ މަޖިލީހުން ވަނީ މާދަމައަށް ތާވަލްކޮށްފައެވެ. މަޖިލީހުގެ ތަޅުމަށް އައްބާސްގެ ނަން ހުށައެޅި ފާސްވުމުން ރަސްމީގޮތުން މަގާމުގެ މަސްއޫލިއްޔަތު އެ ބޭފުޅާއަށް އަރުއްވާނީ ރައީސުލްޖުމްހޫރިއްޔާ ޑރ. މުހައްމަދު މުއިއްޒުއެވެ.

އައްބާސް ވަނީ ޔުނިވާސިޓީ އޮފް ޓެސްމޭނިއާ އިން ގާނޫނީ ދާއިރާގެ މަތީ ތައުލީމް ހާސިލް ކުރައްވާފައެވެ. އަދި 2011 ވަނަ އަހަރުން ފެށިގެން 2015 އަހަރާއި ހަމައަށް އައްބާސް ވަނީ ހައިކޯޓުގެ ފަނޑިޔާރުކަން ވެސް ކުރައްވާފައެވެ.

މީގެ ކުރިން ޕްރޮސެކިއުޓާ ޖެނެރަލްގެ މަގާމުގައި ހުންނެވީ އަލް އުސްތާޒް ހުސެއިން ޝަމީމްއެވެ. ނަމަވެސް ޝަމީމްގެ މައްޗަށް ކުރެވުނު ތުހުމަތުތަކުގެ ސަބަބުން މަޖިލީހުގެ ކޮމިޓީ އިން ދިރާސާ ކުރުމަށް ފަހު ވަނީ ޝަމީމް އެމަގާމުން ވަކި ކުރައްވާފައެވެ.