މޯލްޑިވްސް ޕޯޓްސް ލިމިޓެޑް (އެމްޕީއެލް) އިން އައްޑޫ ސިޓީގައި ސީފުޑް ހަބަކާއި ވެހިކަލް އެކްސްޕޯޓް ކުރެވޭނެ ޓާމިނަލެއް ތަރައްގީ ކުރަން ނިންމައިފިއެވެ.

އެ ކުންފުނިން އެ މަސައްކަތް ކުރަން ނިންމާފައިވާ ކަން އިއުލާންކުރީ ރާއްޖޭގެ ނޫހަކަށް ދެއްވި އިންޓަވިއުއެއްގައި، އެ ކުންފުނީގެ ސީއީއޯ ހައްމަދު ވަޖީހު އިބްރާހިމްއެވެ.

އެ މަސައްކަތްތަކާ ގުޅޭ ގޮތުން ވަޖީހު ވިދާޅުވީ، އެ މަސައްކަތުގެ ދަށުން އެމްޕީއެލްގެ އަމާޒަކީ އެ ސަރަހައްދުގައި ފްރީ ޒޯން އޭރިއާއެއް ގާއިމުކޮށް އައްޑޫ ބަނދަރު ތަރައްގީ ކުރުން ކަމަށާއި އޭގެ ސަބަބުން ދިވެހި އަދި ބޭރުގެ ވިޔަފާރިތަކަށް އިގްތިސާދީ ގޮތުން ބޮޑެތި ފުރުސަތުތަކެއް ފަހިވާނެ ކަމަށެވެ.

ވަޖީހު ވިދާޅުވި ގޮތުގައި ފްރީ ޒޯން އޭރިއާގައި ބަނދަރު ކައިރީގައި ބިން ހިއްކުމުގެ ބޮޑު މަޝްރޫއެއް ހިމެނުމަށް ހަމަޖެހިފައިވާއިރު، އެ ސަރަހައްދުގައި ބައިނަލްއަގުވާމީ ސީފުޑް ހަބެއް ތަރައްގީ ކުރުމަށް ވަނީ ހަމަޖެހިފައެވެ. އަދި އެ ސީފުޑް ހަބްގެ ސަބަބުން ރާއްޖޭގެ ސީފުޑް އެކްސްޕޯޓް ކުރުމުގެ ގާބިލްކަން އިތުރުވެ، ސީފުޑްގެ އުފެއްދުންތައް ޕްރޮސެސްކޮށް ބައިނަލްއަގުވާމީ ބާޒާރަށް ފޮނުވުމުގެ ޒަމާނީ ވަސީލަތްތައް ލިބޭނެއެވެ.

ސީފުޑް ހަބްގެ އިތުރުން އައްޑޫ ބަނދަރުން ވެހިކަލް އެސެމްބްލްކޮށް އެކްސްޕޯޓް ކުރުމަށް ރާވާފައިވާ ކަމަށް ވަޖީހު ވިދާޅުވިއެވެ. އެގޮތުން ވަޖީހު ވިދާޅުވި ގޮތުގައި، އެ މަސައްކަތުގެ ސަބަބުން ރާއްޖޭގައި ވެހިކަލްތައް އެސެމްބްލްކޮށް، އެހެން ގައުމުތަކަށް އެކްސްޕޯޓް ކުރުމުގެ ފުރުސަތު ފަހިވާނެއެވެ. އަދި އެކަމުގެ ސަބަބުން ރާއްޖޭގެ އިގްތިސާދަށް އިތުރު އާމްދަނީ ވަންނާނެ ކަމުގައި ވަޖީހު ވިދާޅުވިއެވެ.

އެމްޕީއެލް އިން އައްޑޫ ސިޓީއަށް ކަނޑައަޅާފައިވާ ތަރައްގީގެ ޕްލޭންތަކަކީ ރާއްޖޭގެ ޖިއޮގްރަފީ ފައިދާގެ ބޭނުން ހިފައި، ވިޔަފާރި އާއި އިންވެސްޓްމަންޓްގެ ފުރުސަތުތައް އިތުރުކޮށް، ރާއްޖޭގެ އިގްތިސާދީ ކުރިއެރުމަށް އެހީތެރިކަން ފޯރުކޮށްދިނުން ކަމުގައި ވެސް ވަޖީހް ވިދާޅުވިއެވެ.