އިނގިރޭސި ޕްރިމިއަރ ލީގުގައި އެންފީލްޑްގައި ލިވަޕޫލް އާއި އާސެނަލް ވާދަކުރިމެޗު 2-2 އިން އެއްވަރުވެއްޖެއެވެ. މި މެޗުގައި އާސެނަލްގެ މިކެލް މެރިނޯ ރަތް ކާޑު ލިބުމާއެކު މެޗު ނިންމާލަން ޖެހުނީ 10 ކުޅުންތެރިންނާއެކުގައެވެ.

މެޗުގެ ފުރަތަމަ ބައިގައި ލިވަޕޫލް ވަނީ ވަރަށް މޮޅު ކުޅުމެއް ދައްކާފައެވެ. 20 ވަނަ މިނެޓްގައި ކޯޑީ ގަކްޕޯ އަދި އޭގެ 87 ސިކުންތު ފަހުން ލުއިސް ޑިއާޒް ވަނީ ލިވަޕޫލްއަށް ލީޑު ހޯދައިދީފައެވެ. ނަމަވެސް ދެވަނަ ހާފުގައި އާސެނަލް ވަނީ ހައިރާންކުރުވަނިވި ކަމެބެކެއް ހަދާފައެވެ.

47 ވަނަ މިނެޓްގައި ގެބްރިއެލް މާޓިނެލީ އަދި 70 ވަނަ މިނެޓްގައި މެރިނޯ ވަނީ އާސެނަލްއަށް ގޯލު ކާމިޔާބުކޮށްދީފައެވެ. ނަމަވެސް މެރިނޯއަށް 79 ވަނަ މިނެޓްގައި ދެވަނަ ރީނދޫ ކާޑު ލިބުމާއެކު ރަތް ކާޑު ދެއްކުމުން މެޗުގެ ފަހު މިނެޓުތަކުގައި އާސެނަލް ކުޅެން ޖެހުނީ 10 ކުޅުންތެރިންނާއެކުގައެވެ.

މި މެޗުން ލިބުނު ޕޮއިންޓާއެކު އާސެނަލް ވަނީ ލިވަޕޫލްއާ ދެމެދު 15 ޕޮއިންޓުގެ ގެޕެއް ހިފަހައްޓާފައެވެ. އަދި ތިންވަނައިގައި އޮތް ނިއުކާސަލްއަށްވުރެ 2 ޕޮއިންޓް އިތުރަށް ލިބިފައި އޮތުމާއެކު، އަންނަ އާދިއްތަ ދުވަހު ނިއުކާސަލްއާ ކުޅޭ މެޗުން މޮޅުވެއްޖެނަމަ، އާސެނަލްގެ ޗެމްޕިއަންސް ލީގު ޖާގަ ޔަގީންވާނެއެވެ.