އެމްޑީޕީއަކީ ރާއްޖޭގެ އިގްތިސާދީ ހާލަތާމެދު ވިސްނައި، ކަންބޮޑުވެ އެއްވެސް ހައްލެއް ގެނައުމަށް މަސައްކަތް ކުރި ބައެއް ނޫން ކަމަށް ރައްޔިތުންގެ މަޖިލީހުގެ މެޖޯރިޓީ ލީޑަރު، އިނގުރައިދޫ ދާއިރާގެ މެންބަރު އިބްރާހިމް ފަލާހް މިއަދު ވިދާޅުވެއްޖެއެވެ.

ފަލާހް މިފަދައިން ވިދާޅުވެފައިވަނީ މިއަދު ބޭއްވުނު މަޖިލީހުގެ ޖަލްސާގައި، ކައުންސިލްތަކާއި އަންހެނުންގެ ތަރައްގީއަށް މަސައްކަތް ކުރާ ކޮމިޓީ (ޑަބްލިއުޑީސީ) ގެ ގޮނޑިއެއް ހުސްވުމަށް ފަހު ދައުރު ހަމަވާން ބާކީ އޮތީ ދޮޅު އަހަރު ނަމަ އިންތިހާބު ބާއްވަން ނުޖެހޭ ގޮތަށް ސަރުކާރުން ހުށަހެޅި އިސްލާހް ބިލަށް ވާހަކަ ދައްކަވަމުންނެވެ.

"އެމްޑީޕީގެ އެއްވެސް ވެރިކަމެއްގައި ރާއްޖެއަށް އާމްދަނީއެއް ލިބޭނެ އެއްވެސް މަގެއް ފަހި ކުރުމަށްޓަކައި، ކުރި މަސައްކަތްތެއް ނެތް. އަބަދުވެސް ވިސްނުމުގައި ގެންގުޅެފައި ވަނީ ހަރަދު ބޮޑު ސިޔާސަތެއް ގެނައުމަށް،" ފަލާހް ވިދާޅުވިއެވެ.

އިތުރަށް ވާހަކަފުޅު ދައްކަވަމުން، ފަލާހް ވިދާޅުވީ 18 ވަނަ މަޖިލީހުގައި ކައުންސިލްތަކުގެ މެމްބަރުންގެ އަދަދާ ގުޅޭގޮތުން އިސްލާހެއް ގެނެސްފައި ވަނިކޮށް، މަޖިލީހުގެ މެޖޯރިޓީގެ ބޭނުން ނަހަމަ ގޮތުގައި ހިފައި ކުދި އާބާދީތަކުގައި ތިބޭނެ ކައުންސިލް މެމްބަރުންގެ އަދަދު ވެސް އިތުރު ކުރި ކަމަށެވެ.

"އާބާދީގައި ހާހެއްހާ މީހުން ދިރުއުޅޭ ރަށްތަކަށް ނުވަތަ އާބާދީ 500 އަށް ވެސް ނާރާ ރަށްތަކުގައި 05 ކައުންސިލް މެމްބަރުން ތިބުމުގެ ބޭނުމެއް ނެތް. ރަށުގެ އޮފީހުގެ މަސައްކަތްތައް ނިންމަނީ ކައުންސިލުން ނޫން. އެކަމުގައި އުޅޭނެ މުވައްޒަފުން ތިބޭނެ،" ފަލާހް ވިދާޅުވިއެވެ.