އެފްއޭއެމް ލީގު ކަޕް ފުޓްބޯޅަ މުބާރާތުގައި އޮޑި ސްޕޯރޓްސް ބަލިކޮށް ނިއު ރޭޑިއަންޓް ސްޕޯޓްސް ކްލަބުން ސެމީގެ ޖާގައެއް ހޯދައިފިއެވެ. ރޭގައި ކުލުނު މެޗު ނިއުރޭޑިއަންޓުން ކާމިޔާބުކުރީ 2-0 އިންނެވެ.

މި މެޗުގައި ނިއުރޭޑިއަންޓުގެ ފަރާތުން މެޗު ކޮންޓްރޯލްކޮށްގެން ރީތި ކުޅުމެއް ވަނީ ފެނިގެން ގޮސްފައެވެ. ނިއުގެ ފުރަތަމަ ލަނޑު 17 ވަނަ މިނެޓުގައި ޖަހައިދިނީ ގާނާގެ ތޯރިގު ޖެބްރިންއެވެ. އަދި ދެވަނަ ހާފުގެ 72 ވަނަ މިނެޓުގައި އިބްރާހިމް ރިޒްހާން (ރިޒްކޯ) ވަނީ އޭރިޔާގެ ބޭރުން ޖެހި ބާރު ޝޯތަކުން ދެވަނަ ލަނޑު ޖަހައިދީފައެވެ.
މެޗުގައި ނިއުގެ ކީޕަރު ތޮލާލް ހަސަން (ޓޮޕްލަކް) ވަނީ ތަޖުރިބާގެ ބޭނުންކޮށް ރަނގަޅު ކުޅުމެއް ދައްކައި، އޮޑީގެ ގިނަ ހަމަލާތަކެއް ހުއްޓުވައިފައެވެ.

މި ނަތީޖާއާއެކު، ފަސް ޓީމު ވާދަކުރާ ލީގު ކަޕްގެ ލީގު ބުރުގައި ބާކީ ދެ މެޗު އޮއްވައި ސެމީ ފައިނަލުގެ ޖާގަތައް ޔަގީންވެފައިވެއެވެ. މި ވަގުތު މާޒިޔާ ސްޕޯޓްސް އެންޑް ރެކްރިއޭޝަން ވަނީ ތިން މެޗުން 9 ޕޮއިންޓާއެކު އެއްވަނައިގައެވެ. ދެވަނައިގައި އޮތް ނިއު އަށް ތިން މެޗުން 6 ޕޮއިންޓް ލިބިފައިވާއިރު، ތިންވަނައިގައި އޮތް އޮޑި އާއި ހަތަރުވަނައިގައި އޮތް ޓީސީ ސްޕޯޓްސް ކްލަބަށް ވަނީ 4 ޕޮއިންޓް ލިބިފައެވެ.

ލީގު ކަޕްގައި ދެން މެޗުތައް ކުޅޭނީ އަންނަ ބުދަ ދުވަހުއެވެ. އެ ދުވަހު ހަވީރު އޮޑި އާއި މާޒިޔާ ބައްދަލުކުރާއިރު، އެރޭ ނިއު އިން މަހިބަދޫއާ ބައްދަލުކުރާނެއެވެ. އެ މެޗުތަކަށް ފަހު ސެމީ ފައިނަލްގައި ކުޅެން ޖެހޭ މެޗުތައް ޔަގީންވާނެއެވެ. ލީގު ބުރުގެ އެއްވަނަ ކުޅެން ޖެހޭނީ ހަތަރުވަނައާ އެވެ. އަދި ދެވަނަ ޓީމު ކުޅެން ޖެހޭނީ ތިންވަނަ ޓީމާއެވެ.