އެފްއޭއެމްގައި ކުރިން ތިއްބެވި ބޭފުޅުން ނިއުރޭޑިއެންޓާއި ދޭތެރޭ އަމަލުކޮށްފައި ވަނީ ވަރަށް ބޭއިންސާފުން ކަމަށާ އެކަމުގެ ސަބަބުން މުޅި ދިވެހި ފުޓުބޯޅައަށްވެސް ހީނަރުކަން ލިބުނު ކަމަށް ނިއުރޭޑިއަންޓްގެ ޗެއާމަން އަހުމަދު މުބީން ވިދާޅުވެއްޖެ އެވެ.

ނިއުރޭޑިއަންޓޫން މިއަދު ބޭއްވި ނޫސްވެރިންގެ ބައްދަލުވުމުގައި އެކްލަބުގެ ޗެއާމަން އަހުމަދު މުބީން ވިދާޅުވީ އެންމެ ފަހުން އެފްއޭއެމް އާއި ހަވާލުވެ ތިއްބެވި ބޭފުޅުން އަމަލުކޮށްފައި ވަނީ ޒާތީ ތައައްސަބު އިސްކޮށް ވަރަށް ބޭއިންސާފުން ކަމަށެވެ.

ފުރަތަމަ ޑިވިޝަންގައި ނިއުރޭޑިއަންޓް ކުޅެމުން އަންނަނިކޮށް ފީފާ އޭއެފްސީން ކްލަބާ ދެތެރޭ އެޅި ފިޔަވަޅަކީ ކުޅުންތެރިން އެއް ކްލަބުން އަނެއް ކްލަބަށް ޓްރާންސްފާ ކުރުން ބޭން ކުރުމަށް އެޅި ފިޔަވަޅެއް ކަމަށެވެ. އެއީ ހަމަ އެކަނި ކުޅުންތެރިން ޓްރާންސްފާ ބޭން އެއް ކަމަށޤ މުބީން ވިދާޅުވި އެވެ.

އެހެން ނަމަވެސް މުބާރާތްތަކުގައި ނުކުޅެވޭ ގޮތަށް އެފުރުސަތު ނިއުރޭޑިއަންޓަށް ގެއްލުވާލީ އޭރު އެފްއޭއެމްގައި ތިއްބެވި ބޭފުޅުން ވަރަށް ބޭއިންސާފުން ޒާތީ ތައައްސަބު އިސްކޮށް އަދުލުވެރިކަމެއް ނެތި ވަރަށް ދެރަކޮށް ކުރި ކަމެއް ކަމަށް މުބީން ވިދާޅުވި އެވެ. އެކަމުގެ ސަބަބުން މުޅި ދިވެހި ފުޓު ބޯޅައަށްވެސް ވަރަށް ބޮޑު ހީނަރުކަމެއް އައި ކަމަށް މުބީން ވިދޅާުވި އެވެ. ދިވެހި ފުޓުބޯޅައިގެ އިތުރުން ސަޕޯޓަރުންނަށްވެސް ލިބުނު ވަރަށް ބޮޑު ނިކަމެތި ކަމެއް ކަމަށް މުބީން ވިދާޅުވި އެވެ.

މުބީން ވިދާޅުވީ ނިއުރެޑިއަންޓްގެ ނަމުގައި އެއްގޮތަކަށްވެސް ކުޅެވެން ނެތުމުން ރޭޑިއަންޓުގެ ނަމުގައިވެސް ނިކުންނަށް މަސައްކަތް ކުރުމުން އެކަމަށްވެސް އޭރު އެފްއޭއެމްގައި ތިއްބެވި ބޭފުޅުން ހުރަސް އެޅި ކަމަށެވެ. އެކި ގޮތް ގޮތުން މަސައްކަތް ކޮށްގެން ލުއި ތަކެއް ލިބުމުން ދެވަނަ ޑިވިޝަންގައި ކުޅުމުގެ ފުރުސަތު ނިއުރޭޑިއަންޓަށް ލިބިގެން ދިޔަކަން މުބީން ފާހަގަ ކުރެއްވި އެވެ.

އެފްއޭއެމްއިން ހަވާލުވެ ތިއްބެވި ބޭފުޅުން ޒާތީ ތައައްސަބު އިސްކުރައްވާ ނިއުރޭޑިއަންޓަށް ދޭތެރޭ ވަރަށް ބޭއިން ސާފުން ވަރަށް އަދުލުވެރި ކަމެއް ނެތި ވަރަށް ދެރަކޮށް ހަގީގަތުގަ ކުރި ކަމެއް މިކަމަކީ އޭގެ ނަތީޖާ އަކަށްވީ ދިވެހި ފުޓުބޯޅައިގެ ފުޓުބޯޅައަށް ލޯބި ކުރާ ސަޕޯޓަރުންނަށް ވަރަށް ބޮޑު ނިކަމެތިކަމެއް މިއައީ މިލިބުނީ ދިވެހި ފުޓު ބޯޅައަށް ޖުމްލަކޮށް މިލިބުނީ ވަރަށް ބޮޑު ދެރައެއް ހަގީގަތުގަ އެއީ ހަމަ އެކަނި ނިއު އަށް އެކަންޏެއް ނޫން

ވޭތުވެ ދިޔަ ދުވަސްތަކުގައި ނިއުރޭޑިއަންޓަށް ލިބުނު ގެއްލުން ދިނީ ބަޔަކު ގަސްތުގައި ކްލަބުގެ އަގުވައްޓާލަން ކަމަށާ ނިއުރޭޑިއަންޓާއި ދޭތެރޭ އަމަލު ކުރީ ވަރަށް ބޭއިންސާފުން ކަމަށް ތަކުރަރުކޮށް މުބީން ވިދާޅުވި އެވެ.

އެކަންކަމުން އަރައިގަނެ ޓީމު އަނެއްކާވެސް ނަގާ ކޮޅަށް ޖެހުމުގެ މަސައްކަތް ފަށާފައިވާ ކަމަށް މުބީން ވިދާޅުވި އެވެ. އެގޮތުން ޓީމަށް ކުޅުންތެރިންނާއި ކޯޗުން ހޯދުމުގެ މަސައްކަތް ފަށަފައިވާ ކަމަށް މުބީން ވިދާޅުވި އެވެ.