ތިނަދޫ ސިޓީގައި ދިރިއުޅުމަށް ދޫކޮށްފައިވާ ބަންޑާރަ ގޯއްތިތަކުގެ ވިނަ ނޮޅާ ސާފުކުރުމަށް މުހުލަތެއް ދީފިއެވެ.

މިކަމާ ގުޅޭގޮތުން ތިނަދޫ ސިޓީ ކައުންސިލުން ނެރެފައިވާ އެންގުމެއްގައި ބުނީ، ދިރިއުޅުމަށް ދޫކޮށްފައިވާ ގޯތިތައް ސާފުނުކޮށް، އެ ގޯތިތަކުގެ އިންފާރު ނުރާނާ ހުންނަ ކަމުގެ ޝަކުވާ ކައުންސިލަށް ހުށަހެޅިފައިވާ ކަމަށާއި، އެ ގޯތިތައް ސާފުކޮށް ބެލެހެއްޓުމަކީ ގޯތީގެ ވެރިފަރާތުގެ ޒިންމާއެއް ކަމަށެވެ.

"މި ގޯތިތައް ސާފުނުކޮށް، އިންފާރު ނުރާނައި، އަދި ވަރަށް ބޮޑަށް ވިނަ ހެދިފައިވާކަން ފާހަގަކުރެވެއެވެ. މީގެ ސަބަބުން އެ ސަރަހައްދުގައި ދިރިއުޅޭ ރައްޔިތުންނަށް ދަތިތަކާ ކުރިމަތިވެ، އެކަމުގެ ޝަކުވާ ކައުންސިލަށް މެދުނުކެނޑި ލިބެމުންދާކަން ވެސް ފާހަގަކުރަމެވެ. އެހެންކަމުން، މި ގޯތިތައް ޙަވާލުކޮށްފައިވާ ފަރާތްތަކުން ގޯތި ސާފުކުރުމަށް އަންގަމެވެ." - ތިނަދޫ ސިޓީ ކައުންސިލުން ނެރުނު އެންގުމުގައި ބުންޏެވެ.

މީގެ އިތުރުން އެ އެންގުމުގައި ބުނީ، ގޯތި ސާފުކޮށް، ވިނަ ނޮޅައި، އަދި އިންފާރު ރާނައި ބެލެހެއްޓުމަކީ ގޯތީގެ ވެރިފަރާތުގެ ޒިންމާއެއް ކަމަށާއި، އެ އެންގުމުގެ ތާރީޚު ކަމުގައިވާ މިއަދުން ފެށިގެން ހަތް ދުވަހުގެ ތެރޭގައި ގޯތި ސާފުކޮށް ނުނިމޭ ނަމަ، ކައުންސިލުން ގޯތި ވަކިކުރުމުގެ އިޖުރާއަތުތައް ފަށާނެ ކަމަށެވެ.