ގދ. ތިނަދޫއަށް ސިޓީއެއްގެ ދަރަޖަ ދިނުމުގައި އޮޅުވާލުންތަކެއް ހުރި ކަމަށް ތުހުމަތުކޮށް އެ މައްސަލަ ބެލުމަށް ލޯކަލް ގަވަމަންޓް އޮތޯރިޓީ (އެލްޖީއޭ) އަށް ހުށަހަޅައިފިއެވެ.

މި މައްސަލަ އެލްޖީއޭއަށް ހުށަހެޅުއްވީ ތިނަދޫއަށް ނިސްބަތްވާ ތިނަދޫ އުތުރު ދާއިރާގެ މެންބަރު ސައުދުﷲ ހިލްމީ އެވެ.

މައްސަލަ ހުށަހަޅުއްވައި މެމްބަރު ސައުދު ފޮނުއްވި ސިޓީގައި ވިދާޅުވީ ތިނަދޫ ސިޓީއަކަށް ބަދަލު ކުރުމުގައި ކަންކޮށްފައިވާގޮތުގައި ދިވެހި އެތައް ބަޔަކު އިންތިހާއަށް ކަންބޮޑުވާ އަދި ގާނޫނާއި ހިލާފު އެތައް ކަމެއް ހިނގާފައިވާ ކަމަށެވެ.

ކުރިއަށް އޮތްތަނުގައި އެފަދަ ކަންކަން ތަކުރާރުވިޔަ ނުދިނުމަށް މަކަރާއި ހީލަތާއި އޮޅުވާލުމާއި އެނޫންވެސް ޖިނާއީ މައްސަލަތައް ކަމަށް ބެލެވޭ މައްސަލަތައް ބެލުމަށް ފުލުހުންނަށް ފޮނުވުމަށާއި މިކަމުގައި ބޮޑެތި ގޯސްތަކެއް ހަދާފައިވާ ކަމަށް އެލްޖީއޭއަށް ފެންނަނަމަ ތިނަދޫ ކައުންސިލާ ދޭތެރޭ ފިޔަވަޅު އެޅުމަށް ސިޓީގައި މެމްބަރުވަނީ ގޮވާލައްވާފައެވެ.
ގދ. ތިނަދޫ އަށް ސިޓީއެއްގެ ދަރަޖަ ދީފައިވާ މައްސަލައާއި ގުޅިގެން އެކަމާއި ގުޅޭ މައްސަލައެއް މެމްބަރުވަނީ މަޖިލީހަށްވެސް ހުށަހަޅާފައެވެ.
10،000 މީހުން ހަމަނުވަނީސް ގދ.ތިނަދޫ އަކީ ސިޓީއެއް ކަމަށް ކަނޑައަޅައި އެރަށަށް ސިޓީއެއްގެ ދަރަޖަ ދީފައިވަނީ ކުރީގެ ރައީސް އިބްރާހިމް މުޙައްމަދު ޞާލިޙުގެ ރިޔާސީ ކެމްޕޭނުގެ ތެެރޭގައެވެ.

Ad by Hajj Corporation

އެއާއެކު ތިނަދޫއަށް ދީފައިވާ ސިޓީއެއްގެ ދަރަޖަ ބާތިލް ކުރުމަށް ހައިކޯޓަށް ދުސްތޫރީ މައްސަލައެއްވެސް ހުށަހެޅިގެންދިޔައެވެ. 

އިދާރީ ދާއިރާތައް ލާމަރުކަޒީ އުސޫލުން ހިންގުމަ ބެހޭ ގާނޫނުގައި ވާގޮތުން ރަށަކަށް ސިޓީއެއްގެ ދަރަޖަ ދެވޭނީ އެރަށެއްގެ އާބާދީގައި 10،000 މީހުން ހަމަވުމުންނެވެ.